Actualidad de Pesca

A conselleira do Mar, Rosa Quintana, participou nun encontro coa directora xeral de Asuntos Marítimos e Pesca (DG Mare) da Comisión Europea, Charlina Vitcheva, no que lle trasladou a necesidade de apostar polo aspecto social na futura reforma da Política Pesqueira Común (PPC) atendendo de forma preferente ás persoas do sector pesqueiro e impulsando a remuda xeracional. A titular de Mar expuxo este e outros asuntos de actualidade no eido marítimo-pesqueiro galego no marco dun encontro celebrado ao amparo do grupo de traballo de pesqueiras da Conferencia de Rexións Periféricas e Marítimas (CRPM) de Europa.

A conselleira do Mar, Rosa Quintana, destacou hoxe que Galicia conta cun plan de reactivación para o eido marítimo-pesqueiro ante a crise derivada do coronavirus que suporá unha inxección global de 77 millóns de euros en 2020 no complexo mar-industria a través de cinco liñas de apoio que buscan aportar liquidez e solvencia ás empresas do sector para garantir a súa sustentabilidade e competitividade ante as dificultades actuais derivadas da covid-19. O obxectivo deste plan é que ninguén quede atrás no camiño da recuperación e que o sector volva á situación previa á pandemia o antes posible. O plan de reactivación e dinamización do eido marítimo-pesqueiro, denominado Avantemar, pretende ser un programa xeral de apoio ao sector ante as importantes perdas acumuladas nos últimos meses.

A conselleira do Mar, Rosa Quintana, mantivo hoxe unha xuntanza por videoconferencia con representantes da Alianza Pesqueira Europa (EUFA) e de distintas entidades pesqueiras galegas na que analizou a falla de avances na negociación da Unión Europea co Reino Unido sobre o brexit e na que apelou a manter a unidade de acción do sector pesqueiro europeo ante este escenario. Con ese obxectivo, a titular de Mar anunciou que Galicia asinará unha segunda declaración en favor das comunidades pesqueiras ante o brexit -a coñecida como declaración de Santiago- para que o sector conte cunha posición de forza na defensa dos seus intereses.

Galicia demanda ao Ministerio de Agricultura, Pesca e Alimentación que medie ante o Ministerio de Asuntos Exteriores, UE e Cooperación para que realice as xestións necesarias ante as institucións comunitarias co obxectivo de que a consecución dun acordo pesqueiro que defenda os intereses da frota española sexa un asunto prioritario na negociación das autoridades europeas co Reino Unido. Neste sentido, a conselleira do Mar, Rosa Quintana salientou a importancia de que os responsables do Executivo comunitario, como a nova directora xeral de Asuntos Marítimos e Pesca (DG Mare) da Comisión Europea, Charlina Vitcheva, sexan conscientes da transcendencia económica e social que o sector pesqueiro ten en rexións como Galicia.

A secretaria xeral técnica da Consellería do Mar, Isabel Concheiro, participou nos últimos días nunha reunión telemática da Conferencia de Rexións Periféricas e Marítimas (CRPM) con varias entidades europeas e co presidente da Comisión de Pesca do Parlamento Europeo, Pierre Karleskind, na que explicou as necesidades dos sectores marítimo-pesqueiro e da acuicultura de Galicia e as medidas adoptadas neste eido fronte á crise do coronavirus. Na súa intervención Isabel Concheiro advertiu da necesidade de articular unha cantidade económica maior dentro do futuro Fondo Europeo Marítimo e de Pesca 2021-2027 con posibilidade de adianto coa finalidade de facer fronte ás axudas necesarias para garantir a dinamización e a competitividade do sector nesta nova sociedade e mercado derivada da alerta sanitaria da covid-19.

O Centro Tecnolóxico do Mar-Fundación Cetmar e os seus socios no proxecto europeo ClimeFish presentarán a próxima semana os resultados do traballo realizado durante catro anos para facilitar a adaptación ao cambio climático nos ámbitos da pesca e da acuicultura en Europa. Será durante a celebración do Foro Internacional 2020 sobre os Efectos do Cambio Climático na Pesca e na Acuicultura, un encontro que organiza o consorcio ClimeFish os días 25 e 26 de febreiro na sede da Organización das Nacións Unidas para a Alimentación e a Agricultura (FAO). O ente participará no evento, que supón o peche deste proxecto europeo, cunha sesión de interacción e o diálogo entre os distintos actores.

Reuniuse hoxe o pleno do Consello Galego de Pesca no que, entre outros asuntos, se analizaron co sector as posibilidades de pesca acordadas para o 2020 nas negociacións do Consello de Ministros de Pesca da Unión Europea celebrado en decembro do ano pasado en Bruxelas. Nesta xuntanza púxose de relevo que a negociación efectuada neste Consello de Ministros permitiu mellorar en máis dun 16% a proposta inicial da Comisión Europea. Galicia participou neste encontro como representante das comunidades autónomas españolas con varios informes socioeconómicos para defender que a xestión dos recursos debe basearse no equilibrio entre os aspectos medioambiental, social e económico.

A nova Lei de Pesca Continental, que substitúe á de 1992, contempla a creación das Escolas de río, co fin de implicar e educar aos máis pequenos na conservación dos ecosistemas acuáticos continentais, e nas que os mozos de idade igual ou inferior a 14 anos poderán practicar pesca sen necesidade de licencia sempre que estean acompañados por un adulto con licencia. Para fomentar a pesca sustentable, poranse en marcha medidas como actividades de promoción e divulgación de xeito preferente por parte de entidades colaboradoras de pesca; programas de formación específica dentro da Estratexia galega de educación ambiental; ou a limitación desta modalidade como a única permitida no caso dos escenarios deportivos, sociais e de formación.

Galicia defende a necesidade de contar con plans de continxencia que inclúan a concesión de axudas á frota afectada por unha posible paralización da actividade en caso dun divorcio abrupto e que se estude a posibilidade de destinar a parte do Fondo Europeo Marítimo e de Pesca (FEMP) non empregada en anos pasados a achegas para minorar o impacto do brexit. Trátase dunha medida que xa foi trasladada á Comisión Europea e que se defendeu recentemente nunha sesión extraordinaria sobre o brexit e a pesca celebrada no marco da asemblea xeral da Comisión do Arco Atlántico en Portugal e que dá continuidade ao traballo realizado nos últimos meses neste sentido.

Celebrouse a sesión extraordinaria sobre o brexit e a pesca celebrada no marco da asemblea xeral da Comisión do Arco Atlántico en Porto, onde Galicia presentou as súas aportacións á Declaración política aprobada neste encontro. Unha das fundamentais é a petición de que a Comisión Europea analice a posibilidade de destinar a parte do Fondo Europeo Marítimo e de Pesca non empregada en anos previos a axudas para minorar o impacto do brexit. A segunda das aportacións é a petición de que a Unión Europea e o Reino Unido traballen conxuntamente para protexer e desenvolver a cooperación existente entre as rexións da UE e as zonas atlánticas do Reino Unido, os territorios británicos de ultramar e terceiros países.