jueves, 5 de noviembre de 2026
Declaracións da Conselleira de Pesca na súa visita ás instalacións de Projoscar, no Porto de Tragove (Cambados)
A Conselleira de Pesca e Asuntos Marítimos, Carmen Gallego Calvar, acompañada pola directora xeral de Innovación e Desenvolvemento Pesqueiro, Fátima Linares, e a delegada de Pesca en Pontevedra, Ángeles Montero, visitou as instalacións da firma Projoscar no Porto de Tragove (Cambados). Trátase dunha granxa mariña, que se dedicará ao cultivo de rodaballo, que ten previsto comezar a funcionar no primeiro trimestre do ano que vén.
Segundo destacou a Conselleira na súa visita ás instalacións, esta empresa ten feito unha inversión de ao redor de sete millóns de euros, e conta con apoio da Administración pesqueira galega que ten aportado preto de tres millóns de euros para esta actuación.
Esta granxa mariña aplicará un sistema de recirculación de auga, polo que será a segunda que estableza este sistema despois da granxa Aquacría, tamén de Cambados. Este sistema, máis sustentable, permite un maior aforro enerxético. Sistemas coma este son os que se priman no Plan Galego de Acuicultura.
Carmen Gallego, no encontro que tivo cos medios despois do percorrido polas instalacións, quixo deixar claro que o acordo acadado entre Arousa Norte e Pladimega, coa mediación da Consellería de Pesca en ningún caso é un acordo de prezos senón un acordo sobre a distribución e a organización da produción. Así mesmo, destacou que a mensaxe que os conserveiros deberían dar aos seus consumidores e á sociedade é que van a seguir mercando e envasando mexillón de Galicia, porque os consumidores o que queren é que nas latas de conserva haxa produto galego.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
