sábado, 8 de agosto de 2026
A representante do Executivo galego destacou que se todas as rexións pesqueiras europeas seguen traballando de xeito conxunto como ata agora acadarán unha fortaleza que facilitará que as súas demandas sexan atendidas na negociación do futuro acordo pesqueiro entre as autoridades europeas e as británicas. Por iso, trasladou ao sector que a Xunta prevé reeditar a declaración de Santiago, asinada polo presidente de Goberno autonómico, Alberto Núñez Feijóo, en outubro de 2017 converténdose no primeiro responsable dunha rexión europea en asinalo.
A conselleira do Mar lamentou que as partes vaian xa pola cuarta rolda de contactos na busca dun acordo e que aínda non se rexistrasen avances, polo que pediu ao sector que se manteña unido co obxectivo de que a súa importancia económica e social sexa tida en conta nas negociacións. Neste sentido, salientou a importancia de manter a unidade de acción de todo o sector pesqueiro da Unión Europea para conseguir que o conxunto das institucións europeas ao máis alto nivel reaccionen e se poñan do lado do comisionado europeo para a negociación do brexit, Michel Barnier, na defensa da pesca.
Galicia defende que a negociación do futuro acordo pesqueiro entre a UE e o Reino Unido sexa considerado un asunto prioritario dada a importancia que o complexo mar-industria ten para o conxunto da comunidade e de España, ao igual que noutras rexións pesqueiras europeas. O brexit afecta a arredor dun cento de buques galegos ou propiedade de armadores galegos que faenan en augas do Reino Unido e que dan emprego a máis de 1.700 tripulantes.
Ante este escenario, a Xunta e o sector pesqueiro galego apostan por un acordo pesqueiro que manteña o statu quo, a igualdade de condicións entre as partes -ou level playing field- e que estea condicionado ao acceso mutuo aos recursos, ás zonas pesqueiras e ao mercado. Trátase da mesma solución que defende o último informe encargado polo Executivo galego ao Instituto Universitario de Estudos Europeos Salvador de Madariaga sobre As relacións pesqueiras entre a Unión Europea e o Reino Unido tras o brexit, que advirte de que a ausencia de acordo dificultaría o desembarque dos produtos pesqueiros nos portos de ambas partes e derivaría en trabas administrativas, arancelarias e sanitarias.
Por iso, o documento aposta por manter unhas relacións pesqueiras semellantes ás actuais pero enmarcadas no dereito internacional e por poñer en relación os acordos xa existentes e os compromisos adquiridos no marco da Comisión de Pesqueiras do Atlántico Noreste (Neafc). A chave do pacto, salienta o informe da entidade dirixida polo profesor José Manuel Sobrino, é que reflicta o equilibrio de forzas entre as partes mediante o acceso mutuo aos recursos e ao mercado posto que o libre acceso ás augas e portos é indisociable do libre comercio e da entrada dos produtos do mar de Reino Unido ao mercado da UE.
Xuntanzas co sector
Esta xuntanza telemática con representantes da EUFA e do sector pesqueiro galego súmase á mantida onte con responsables de organizacións pesqueiras da zona da Coruña e ás celebradas a semana pasada con entidades de Burela e Celeiro, nas que a Xunta e a frota abordaron as repercusións que tería para o complexo mar-industria a non consecución dun acordo co Reino Unido así como as medidas a adoptar para defender os intereses galegos durante as negociacións.
O Executivo galego escoitou as inquedanzas do sector ante a situación actual de parálise na negociación do protocolo de retirada do Reino Unido da Unión Europea e trasladou o traballo realizado na defensa dos seus intereses co obxectivo de facer fronte ás incertezas actuais. Con esa finalidade, Galicia aposta pola unidade de acción e a alianza de todas as rexións pesqueiras europeas para garantir a estabilidade e o futuro do sector.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
