Actualidad de Economía

O presidente da Xunta de Galicia, Alfonso Rueda, avanzou que o P.I.B. de Galicia medrará por riba do 1,7 % previsto para este ano, á vez que se amosou confiando en que para o 2024 "estará en condicións" de recuperar o equilibrio orzamentario e non incorrer en déficit. "Imos ser capaces porque levamos tempo traballando", aseverou o mandatario galego, que tamén avanzou que se agarda que no 2024 a economía galega "estea en disposición de superar" o 2 % do PIB.

No Pazo de Quián (Boqueixón), vense de clausurar a gala das Catas de Galicia 2023, na que o Conselleiro de Medio Rural felicitou aos premiados cos mellores viños, augardentes e licores tradicionais deste ano e destacou o papel do sector vitivinícola para levar a marca Galicia por todo o mundo e impulsar a economía no rural galego. No acto, o exconselleiro de Agricultura Fernando Garrido, recibiu o premio de honra en representación de todas as persoas que hai máis de 35 anos apostaron polo potencial do sector.

O conselleiro do Medio Rural participou na clausura da asamblea anual da Federación Europea del Tablero. Neste encontro con membros do sector, José González salientou a importancia da industria da madeira en Galicia e a aposta firme da Xunta para seguir medrando neste eido. Así, destacou que a nosa comunidade é unha potencia forestal en España e Europa, polo que as súas políticas nesta materia son un referente para o resto de rexións, e fixo referencia ao Inventario Forestal Continuo e ao Plan Forestal de Galicia como ferramentas que permiten xestionar o territorio e facer que a nosa comunidade medre no sector forestal, "mantendo os compromisos de transición vrde, biodiversidade, neutralidade climática e consumo responsable".

Galicia pechou o primeiro trimestre do ano cunha ratio débeda/PIB do 17,7% segundo o Protocolo de Déficit Excesivo (PDE) correspondentes ao primeiro trimestre do ano publicados hoxe polo Banco de España. Esta ratio é tres décimas superior á do primeiro trimestre do ano 2022 (17,4%), debido a que a Xunta acelerou nos primeiros meses do ano a execución do seu programa de endebedamento, e executou o 75% do importe de endebedamento autorizado, co obxectivo de aproveitar a estabilidade que ofrecían os mercados financeiros nese período. Este aumento é transitorio e corrixirase nos vindeiros meses.

Xunta e sector coinciden en sinalar que o Goberno central non tivo en conta nin ás comunidades autónomas nin ás organizacións agrarias -cando menos ás galegas con representación nacional- á hora de decidir as achegas directas pola seca, que deixarán aos gandeiros galegos tan só cun 25% dos importes previstos para cada especie e orientación produtiva, porcentaxe destinada ás comunidades que o executivo de Madrid establece como de afectación moderada.

O Observatorio Municipal Galego, da Rede Localis, fixo público este mércores un novo documento de análise da situación económica-financeira dos municipios galegos. Nel, a entidade xestionada polo grupo de investigación Governance and Economics Research Network (Gen) da Universidade de Vigo, destaca que os concellos pequenos destinan 426 euros por persoa a servizos públicos básicos, cifra moi similar á dos grandes municipios. O documento é a nota 24 deste Observatorio Municipal Galego e está elaborada por Alberto Vaquero, profesor da Facultade de Ciencias Empresariais e Turismo do campus de Ourense e codirector da Rede Localis, unha das actividades da Cátedra do Bo Goberno Local da Universidade de Vigo.

A importancia da agricultura e da recuperación e conservación das prácticas agrarias, a necesidade de fortalecer as canles de participación e as redes de conexión e colaboración entre os distintos axentes: veciñanza, produtores, empresas... e a posta en valor da muller como elemento vertebrador da vida social e económica nestes territorios, constitúen algunhas das recomendacións incluídas nas conclusións dos informes elaborados pola plataforma multiactor (MPA) galega liderada pola USC que está a participar no proxecto Sherpa, un programa coordinado desde Bruxelas e financiado con preto de cinco millóns de euros de fondos europeos, no que están implicados unha vintena de países.

Galicia acadou no mes de maio a menor cifra de persoas desempregadas de toda a serie histórica (1996), desde hai 27 anos, e por primeira vez o dato se sitúa por debaixo das 139.000 persoas. A cifra menor ata o de agora reflectiuse o pasado mes, en abril de 2023, cando se contabilizaron 139.343 persoas sen emprego. O paro, con respecto a hai un ano e na comparativa con abril, caeu nas catro provincias galegas, nas sete grandes cidades, en todos os sectores económicos, así como nos colectivos prioritarios como son, entre outros, os menores de 30 anos, as mulleres e os parados de longa duración.

O Foro Económico de Galicia, coordinado desde o campus de Ourense polo Grupo Governance and Economics Research Network (Gen), presentou este xoves dous informes elaborados polos seus expertos e expertas sobre o papel da intelixencia artificial no tecido empresarial galego. Neles destacan que Galicia “non pode deixar de apostar polas enormes posibilidades que ofrece la IA” e inciden na necesidade de formación e de mobilización de recursos económicos para o fomento das empresas deep tech. Segundo indican en nota de prensa desde a entidade, o 'Foro Económico de Galicia considera determinante a implantación da intelixencia artificial nas empresas'.

A Xunta de Galicai avanzou a próxima convocatoria dunha nova edición das axudas á Dixitalización Industria 4.0, un programa que permite impulsar a transformación da industria tradicional cara a modelos tecnolóxicos avanzados, favorecendo modelos de negocio diferenciais baseados na innovación e na tecnoloxía. Estas axudas levan mobilizados máis de 50 millóns de euros desde a súa posta en marcha, sumando máis de 1.000 solicitudes que traballan no coñecemento e a conciencia sobre as vantaxes e oportunidades que ofrece a dixitalización nos distintos ámbitos da industria galega.