miércoles, 11 de noviembre de 2026
O director do Igape, Fernando Guldrís, participou hoxe nos obradoiros de dixitalización promovidos por Asime e que afondaron, desta volta, no sector naval e nas posibilidades que ofrece a enerxía eólica offshore. Durante a súa intervención, Guldrís puxo en valor a importancia que ten a dixitalización como factor determinante para o crecemento e a competitividade dos sectores chave da nosa economía, e avanzou a próxima convocatoria dunha nova edición das axudas á Dixitalización Industria 4.0.
Un programa, lembrou Guldrís, que permite impulsar a transformación da industria tradicional cara a modelos tecnolóxicos avanzados, favorecendo modelos de negocio diferenciais baseados na innovación e na tecnoloxía. O director do Igape destacou que estas axudas levan mobilizados máis de 50 millóns de euros desde a súa posta en marcha, sumando máis de 1.000 solicitudes.
Neste sentido, Guldrís sinalou que o Goberno galego traballa no coñecemento e a conciencia sobre as vantaxes e oportunidades que ofrece a dixitalización nos distintos ámbitos da industria galega. Un obxectivo para o que tamén se impulsan obradoiros dixitais como os celebrados hoxe, que buscan promover a adopción de tecnoloxías dixitais e boas prácticas para incrementar a competitividade e fortalecer a capacidade de resposta ante os desafíos do mercado.
É importante destacar que estes obradoiros, promovidos por organismos intermedios, como é o caso de Asime, fináncianse ao 100 %. E os datos avalan a boa acollida desta iniciativa xa que, desde o ano 2018, apoiáronse máis de 100 obradoiros, o que supuxo un volume de axudas de 1.858.000 euros, resaltou o director do Igape.
Deste xeito, os obradoiros configúranse como espazos de encontro que permiten o intercambio de experiencias e o establecemento de redes de colaboración entre os participantes. A través de ferramentas como os talleres de design thinking e a presentación de casos de éxito, facilitánse alianzas empresariais que impulsen a innovación, a transferencia de coñecemento e a xeración de proxectos colectivos.
Neste sentido, este ciclo de obradoiros permitiu explorar tanto a relación entre o sector naval e conceptos como o xemelgo dixital, ciberseguridade, visión artificial e realidade aumentada, como a intersección entre a enerxía offshore e conceptos como a economía circular, o Internet das cousas (IoT), o Big Data e o Cloud computing.
O 68,7 % da poboación galega de 16 a 74 anos dispón de competencias dixitais básicas ou avanzadas, fronte ao 61,4 % de 2025, o que supón un incremento relativo do 11,9 %. O 42,6 % da poboación galega de 16 a 74 anos ten competencias dixitais avanzadas, cinco puntos porcentuais máis ca en 2025, e o 26,1 % ten competencias básicas. Son datos publicados hoxe polo INE no informe sobre equipamento e uso das TIC nos fogares, analizados polo Observatorio da Sociedade da Información da Axencia para a Modernización Tecnolóxica de Galicia (Amtega).
Foi presentada na Cidade da Cultura a iniciativa 'Circo no Camiño', que celebrará entre o 12 de novembro e o 6 de decembro a súa primeira edición, na que contará con artistas nacionais e internacionais. A proposta Circo no Camiño quere achegar as artes escénicas a diferentes localidades galegas relacionadas co Camiño de Santiago. Para isto avanza unha programación variada de espectáculos de circo, maxia, música, acrobacias, humor e animación de rúa dirixidos a todos os públicos, que se desenvolverán tanto nunha gran carpa como nas rúas.En concreto, a programación desenvolverase en catro localidades galegas: Verín, Lalín, A Estrada e Santiago de Compostela, onde se pechará a programación, entre os días 3 e o 6 de decembro.
