viernes, 6 de noviembre de 2026
Os estudos presentados, sinalan, amosan que os efectos provocados pola IA son unha mellora na eficiencia dos procesos, a xeración de coñecemento, a transformación dos modelos de negocio e un incremento do rendemento operativo. Ademais, consideran que unha estratexia ambiciosa na implantación da IA podería xerar claras vantaxes competitivas entre as comunidades autónomas e, polo tanto, un incremento da riqueza.
Dous estudos
Os informes foron presentados na sede do Consello Económico e Social en Santiago de Compostela. O estudo realizado máis recentemente foi o de María Bastida e Alberto Vaquero, docentes da USC e da Facultade de Ciencias Empresariais e Turismo do campus de Ourense respectivamente, sobre o Desenvolvemento da IA en Galicia. Nel fan unha diagnose do estado actual da IA no tecido empresarial galego, realizada tanto dende unha perspectiva cuantitativa coma cualitativa, incluíndo as opinións de membros do empresariado galego. A principal conclusión deste informe é que a IA está nunha fase incipiente na comunidade galega, pero as empresas manifestan unha intención de adquirir tecnoloxías intelixentes superior á media nacional, sinalan desde o Foro Económico de Galicia. Ademais, engaden sobre as conclusións deste informe Galicia avanza na incorporación de formación en IA con iniciativas no marco do Sistema Galego de Universidades, fundamental para mellorar o grao de coñecemento e dominio das tecnoloxías. Isto permite intuír que a IA en Galicia pode converterse nunha vantaxe competitiva a curto prazo, aínda que para iso convén avanzar no afrontamento de eivas coma o tamaño medio empresarial ou a especialización produtiva, que poden supor barreiras para o completo desenvolvemento da IA na comunidade galega.
O outro dos traballo presentados, titulado Unha estratexia en IA para a empresa galega, foi elaborado por Senén Barro (USC), Luis Otero (USC), Luis Pérez (Gradiant), Óscar González (ITG), Manuel Rodríguez (Deloitte) e Marcos R. Torres (USC) e realiza unha diagnose do estado e potencial da IA no tecido produtivo galego. Nel constatan que en sectores como a construción, a metalurxia e o inmobiliario (algúns deles tractores da economía galega) aínda "son dixitalmente menos avanzados e menos proclives a incorporar IA que outros sectores coma a industria, o turismo e o sector TIC. Entre os sectores galegos con sinais moi claros de aplicación da IA están o da industria, a sanidade, a agricultura ou a enerxía".
En canto ás recomendacións, subliñan desde o Foro Económico de Galicia, ambos informes coinciden en que se debe apostar pola mellora nas infraestruturas, a aposta pola formación combinada no plano formal e informal e o reforzo das liñas de financiamento, incluíndo a posibilidade de creación dun fondo de investimento para as empresas deep tech, as empresas que desenvolvan estratéxicas específicas e que sirvan para que as pemes sexan organizacións áxiles e con capacidade para reaccionar rapidamente ante os cambios do mercado e posuír unha cultura de innovación.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
