Buscador
Noticias
O Inventario Forestal Continuo de Galicia ten como obxectivo establecer unha folla de ruta conxunta que permita, por unha banda, facer seguimento da cantidade e do estado das masas arboradas, e por outra, crear unha estratexia de apoio ás decisións en materia de política forestal mediante un sistema de monitoraxe forestal continuado. Así, este documento dará cumprimento a unha das recomendacións do Ditame da Comisión especial non permanente de estudo e análise das reformas da política forestal, de prevención e extinción de incendios forestais, que sinalaba que era necesario crear un sistema de información e estatística forestal da nosa comunidade.
A demanda turística en Galicia neste primeiro cuadrimestre do ano tivo unha mellor evolución que a media nacional e o descenso é 34 puntos inferior ao rexistrado no conxunto estatal. Así o reflicten os datos publicados polo Instituto Nacional de Estatística (INE) que recollen que mentres que a caída da demanda a nivel nacional foi do 71% no período de xaneiro a abril de 2021 en Galicia foi do 37% respecto do mesmo período de 2020. Neste contexto Galicia sitúase como a terceira comunidade autónoma con mellor recuperación da súa demanda turística no que vai de ano, só por detrás de Navarra e Castela a Mancha.
A nova aceleradora é un paso máis neste proxecto de cooperación transfronteiriza que une á Xunta, coa Confederación de Empresarios de Pontevedra (CEP), a Autoridade Portuaria de Vigo, así como a Associaçao dos Portos de Douro, Leixões e Viana do Castelo, a Associaçao Empresarial de Portugal e a Cãmara Municipal de Vilanova de Famalição. O obxectivo é apoiar novos proxectos de emprendemento a partir da tecnoloxía, xa que se necesitan proxectos e solucións innovadoras que contribúan a mellorar a eficiencia deste sector. Constará de tres fases: lanzamento, selección e desenvolvemento efectivo, cun itinerario de aceleración ou consolidación das iniciativas.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 2.624, deles 520 son da área da Coruña, 227 da de Lugo, 203 da de Ourense, 333 da de Pontevedra, 805 da área de Vigo, 453 da de Santiago e 83 da de Ferrol. Do total de pacientes positivos, 32 están en UCI, 112 en unidades de hospitalización e 2.480 no domicilio. Polo de agora, en Galicia hai un total de 121.012 persoas curadas, rexistrándose 2.411 falecementos. O número de PCR realizadas é de 2.212.746.
Desde o inicio da pandemia da COVID-19 en España son moitas as plataformas que veñen recollendo as cifras sobre a súa incidencia, non obstante case todas elas se quedan nunha análise superficial. Co obxectivo de poñer remedio a isto, a plataforma que propoñen desde o centro de investigación atlanTTic vai un paso máis aló. Panel Covid recompila todos os datos e informes publicados por fontes oficiais como son o Ministerio de Sanidade, a Renave (Red Nacional de Vigilancia Epidemiológica) e o INE (Instituto Nacional de Estadística) sobre a evolución da pandemia desde o seu inicio, co obxectivo de poder analizalos polo miúdo e amosalos de maneira sinxela e clara a calquera usuario.
O stand de Galicia rexistra o maior número de actividades en Fitur e esperta o interese dos operadores presentes na feira, xa que no expositor da Xunta celebráronse preto dun centenar de reunións profesionais e contactos con operadores de todo o mundo. Nos tres días nos que se desenvolveron as actividades para profesionais, previos á apertura para o público, a oferta turística de Galicia espertou a curiosidade e o interese de boa parte das axencias e operadores turísticos que buscan destinos axeitados para un tipo de cliente que prioriza a seguridade e a tranquilidade trala crise sanitaria. A oferta galega espertou sobre todo o interese de operadores de países europeos e americanos, pero tamén de Rusia ou China.
Galicia tivo unha presencia destacada na Noite Q 2021, a gran gala do turismo impulsada polo Instituto para a Calidade Turística de España e que se celebrou onte no marco da Feira Internacional de Turismo (Fitur) en Madrid. Durante o acto, presidido pola ministra de Industria, Comercio e Turismo, Reyes Maroto, fíxose entrega das distincións ás entidades e empresas que renovaron este ano a súa certificación de calidade. Con 298 distincións, Galicia volve revalidar este ano a súa segunda posición no ranking global de destinos turísticos de calidade, só por detrás de Andalucía.
Tivo lugar a presentación dos vinte e un deportistas galegos preseleccionados no equipo español de cara aos Xogos Paralímpicos de Toquio que terán lugar entre o 24 de agosto e o 5 de setembro. No acto participaron, entre outros, a triatleta Susana Rodríguez, o tirador Juan Saavedra, a atleta Adiaratou Iglesias, o taekwondista Alex Vidal e o piragüista Adrián Mosquera. O 15% da delegación española ten acento galego, un feito que responde a un traballo intenso realizado por todo o tecido deportivo en prol dos deportistas con discapacidade. Do último recoñecemento de deportistas galegos de alto nivel, 17 teñen algunha discapacidade.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 2.701, deles 568 son da área da Coruña, 168 da de Lugo, 211 da de Ourense, 395 da de Pontevedra, 831 da área de Vigo, 440 da de Santiago e 88 da de Ferrol. Do total de pacientes positivos, 32 están en UCI, 128 en unidades de hospitalización e 2.541 no domicilio. Polo de agora, en Galicia hai un total de 120.281 persoas curadas, rexistrándose 2.409 falecementos. O número de PCR realizadas é de 2.190.050. O número de doses de vacina contra a covid-19 administradas é de 1.679.928.
O presidente do Goberno galego, Alberto Núñez Feijóo, destacou hoxe o Polo aeroespacial como un sector clave para a recuperación, cunha folla de ruta para o período 2021-2025 baseada no desenvolvemento industrial; no fomento das capacidades tecnolóxicas e innovadoras, a través da xeración e transferencia de coñecemento ao mercado; e na creación de emprego de calidade, podendo acadar ata os 3.000 postos de traballo. Trala reunión do Consello, Feijóo incidiu en que o sector contribuirá á recuperación aliñándose, ademais, coas metas a nivel estatal e europeo, co fin de xerar riqueza non só a curto prazo, senón crear as tecnoloxías, mercados e empregos do futuro.
