Noticias cultura
A Cidade da Cultura vén de ratificar un acordo coa Fundación Calouste Gulbenkian de Lisboa e a Custodia de Terra Santa de Xerusalén para exhibir entre marzo e agosto de 2024 o extraordinario e pouco coñecido tesouro artístico do Terra Sancta Museum. Santiago de Compostela será o único punto en España onde se poderá ver este conxunto de obras que agora mesmo se exhiben na capital portuguesa, onde veñen de iniciar un itinerario internacional que as achegará a diversas cidades de Europa e América. Ademais de Lisboa e Compostela, ao circuíto internacional da exposición sumaranse en 2024 e 2025 dous destinos máis, respectivamente, en Europa e Estados Unidos.
Esta exposición fai un percorrido pola historia da cidade de Ourense a través de documentos orixinais conservados no Arquivo Histórico Provincial, así como fotografías en paneis e dispositivos electrónicos procedentes doutros centros culturais e de particulares. Colaboran o Arquivo da Catedral de Ourense, a Biblioteca da Deputación de Ourense, a Fundación Cidade da Cultura, Galiciana-Biblioteca Dixital de Galicia, a Coral de Ruada, o Museo Arqueolóxico Provincial de Ourense e o Museo Etnolóxico de Ribadavia.
O Premio Otero Pedrayo está promovido polo Goberno galego e as catro deputacións provinciais. Considerado un dos máis prestixiosos da cultura galega, naceu en 1977 co obxectivo de perpetuar a memoria do autor de Trasalba e así mesmo recoñecer a contribución á cultura de persoas e entidades no campo das letras, e promover os valores propios de Galicia e as obras que leven ao esclarecemento e á mellora da súa cidadanía e institucións. A Deputación de Lugo fora por última vez escenario da entrega deste galardón no ano 2019, cando o recibiron Ramón Villares e Paco Martín.
A mostra inaugurada no Museo de Belas Artes da Coruña está comisariada por Sonia Martínez, conservadora do Museo Sorolla en Madrid e contén preto de 90 pezas entre as que se inclúen óleos, debuxos, acuarelas, téxtiles e incluso xoias elaboradas polo artista e inspiradas nas súas visitas a Galicia. Trátase dunha escolma que retrata o paso do pintor pola nosa terra e tamén a relación que tivo con persoeiros da época como Concepción Arenal. Isto supón unha oportunidade non só para afondar na relación de Sorolla con Galicia, senón tamén para entender como se estaba a construír a Galicia urbana de comezos de século". Ademais, tamén estarán presentes algunhas das pezas máis salientables do autor como La Romería, na que se retrata os xardíns do pazo de Vista Alegre de Vilagarcía de Arousa ou Las lavanderas de Galicia.
O programa Xuventude Crea 2023 premia as mellores creacións en Fotografía e Artes Plásticas. Lucia Castro Álvarez, con 'Todos levamos sal nos ollos', fíxose co primeiro posto no certame de Fotografía; mentres que Abraham Alonso Méndez, coa súa pintura 'IA 1993', venceu na modalidade de Artes Plásticas. As outras creacións galardoadas polo xurado do Xuventude Crea foron en Fotografía as seguintes: 'Ellipsism' de Iria Álvarez Liñares resultou segunda clasificada e 'Persoas' de Alejandra del Carmen Vera Echegaray quedou en terceiro lugar. Tamén houbo dúas mención de honra para Naiara Ayelen Carrazza Ibáñez por 'Paisaxes da alma' e Rodrigo Cruz Gómez, pola súa obra 'Desarraigo'.
Pablo Picasso, durante a súa longa e frutífera traxectoria artística, explorou o campo da obra gráfica, onde atopou un medio de creación alternativo ao debuxo e á pintura, ademais de permitirlle unha maior difusión do seu traballo, xa que a obra gráfica posibilita obter varias estampas iguais a partir dunha mesma imaxe-matriz. Entre estas técnicas que espertaron o seu interese atópase o linogravado, co que realizou 199 imaxes. durante o acto de inauguración da exposición tamén se presentou o seu libro-catálogo, no que se inclúe unha publicación inédita titulada O gravado en relevo en Galicia. A linoleografía, de J. Daniel Buján, na que se amosa con exemplos de linogravados a historia desta técnica en Galicia.
'Francisco Fernández del Riego. Cos ollos do seu espírito' repasa a traxectoria vital e profesional do autor homenaxeado, permitíndolle ao visitante asistir a un percorrido rigoroso e ameno para comprender quen foi, que legado nos deixou e o que implica a súa figura no proceso de consolidación do galego e da súa cultura nos tempos recentes. A mostra, comisariada por Malós Cabrera e Malores Villanueva, consta de 14 paneis informativos e didácticos e mesas-vitrina con material gráfico e documental pertencente a Del Riego.
Federico Mediante, a pesar das súas viaxes e experiencias diversas, mantivo un vínculo especial coa súa terra natal. Neste contexto, a autora, Ana Rosa Martínez Loredo, mergúllanos na fascinante vida do escritor, destacando a súa contribución á cultura española e, en particular, o seu impacto en Galicia. O libro non só ilustra a riqueza do seu legado literario, senón tamén a diversidade de talentos que contribuíron ao enriquecemento da sociedade. A presentación do libro é un testemuño da conexión innegable que Federico Mediante tiña con Galicia, e é un recordatorio de que, aínda que a vida levouno lonxe, o seu espírito sempre estivo arraigado nesta terra.
Testemuñas e perspectivas en homenaxe ao Seminario de Estudos Galegos inclúe un estudo elaborado polo historiador Alfonso Mato que introduce a reprodución facsimilar íntegra da publicación orixinal, na que colaboraran preto dunha vintena de intelectuais da época como Fernández del Riego, Filgueira Valverde ou Carvalho Calero. Por último, a edición da Xunta de Galicia engade un apéndice fotográfico do acto de presentación do caderno en San Domingos de Bonaval o 17 de maio de 1978, con imaxes achegadas por Xosé Díaz. Foi precisamente neste acto cando Ramón Piñeiro falou ante máis de 500 persoas da necesidade de fomentar os estudos sobre a realidade galega nun momento crucial para Galicia.
O documento adoptado hoxe no corazón desta comarca recolle unha vintena de recomendacións entre as que se inclúen a necesidade de seguir promovendo diálogos intersectoriais, foros, encontros e contribucións científicas específicas co fin de preservar o legado desta paisaxe excepcional marcada pola curso dos ríos Sil e Miño. Neste senso, instan a ampliar o coñecemento actual sobre estes sitios esteticamente impresionantes que combinan a biodiversidade agrícola con ecosistemas resilientes e un valioso patrimonio cultural. Os expertos recomendan aos gobernos e administracións públicas identificar e preparar inventarios destas paisaxes e do patrimonio vivo que está presente en cada territorio para fomentar o recoñecemento do seu valor e importancia.
Despois dun outono cheo de exitosos espectáculos como os musicais de 'El Médico, el Musical', 'Peter, el Musical' ou 'La Bella y la Bestia', ou a exposición inmersiva 'Vanguardias', aberta ata 26 de febreiro, o Mar de Vigo prepara novas propostas de primeiro nivel para o primeiro semestre do ano. Dentro destes novos espectáculos están a liña de musicais, pero tamén haberá cabida para o humor, maxia, bandas tributo e, sobre todo, xiras de grandes artistas internacionais.
Cada curso académico, o campus de Ourense participa, ao igual que o campus de Pontevedra, na iniciativa Docs del Mes, un ciclo de cinema documental que se desenvolve de xeito paralelo en preto de 70 cidades de toda España. Neste segundo cuadrimestre serán seis, unha cada mes, as obras internacionais de temáticas moi diversas que se poderán ver de xeito virtual no marco desta iniciativa.
O CDG regresa con esta nova produción ao universo shakespeariano para ofrecerlle ao público unha revisión destes catro títulos, cada un deles condensado en pouco máis de media hora. Esta particular proposta permite unir tres momentos da historia: o presente, o período isabelino e a Roma clásica a través da guerra, a violencia e a loita polo poder que guían o destino dos personaxes, co foco posto nalgúns secundarios presentes nos orixinais.
Un equipo composto por persoal investigador da USC, CSIC, UDC e das universidades de Newcastle e St Andrews acaba de desenvolver un estudo transdisciplinar que demostra que o comezo da formación da paisaxeque rodea o mosteiro de Samos iniciouse durante a Idade de Ferro.
O proxecto Aldearmos, un 'programa de democratización cultural do e no rural' da Rede Aldear, formada por unha vintena de concellos do rural das provincias de Ourense e Lugo, arrancou no Xurés a súa programación de 2023. A iniciativa, que conta co apoio da UVigo e de entidades como Agadic, púxose en marcha o pasado 23 de outubro en Vilar de Santos e desde entón vén percorrendo diferentes puntos do rural galego co obxectivo de contribuír á súa dinamización.
Todos os traballos presentados competirán por entrar nas seccións: Oficial, España, Galicia, Descubertas e Escolas Internacionais, conformando grande parte da programación de proxeccións do e o palmarés do FICBUEU 2023. En paralelo haberá tamén outros cinco apartados non competitivos: Retrospectiva, Curtas en familia, Cativa, Infantil, Xuvenil. Ademais, as e os asistentes votarán in situ para o aclamado Premio do Público.
A cerimonia de entrega de galardóns da cuarta edición do Certame de Videocreación, unha iniciativa promovida ao abeiro do convenio Lugo Cultural, que recibe financiamento da USC, Concello de Lugo e Deputación Provincial de Lugo, converteu o Museo Interactivo da Historia de Lugo nun espazo de arte viva, no que a formación viguesa Trilitrate deleitou ao auditorio cun singular espectáculo de música e creacións visuais ao vivo.
A Biblioteca Universitaria estrea un novo catálogo Iacobus que, ademais de renovar o deseño da páxina web, incorpora Primo, unha potente ferramenta de descubrimento, tal e como explicou a directora da BUSC, Mabela Casal. Iacobus non é agora soamente un catálogo, é tamén unha ferramenta máis completa que nos permite, dende unha única caixa, indagar na colección da Biblioteca (incluíndo recursos electrónicos, texto completo de revistas subscritas pola USC ou en Acceso Aberto).
A pouco que se furgue, agroman infinidade de prexuízos sobre o uso do galego, algúns que semellaban superados e outros que sempre estiveron presentes. Algúns deses prexuízos son os que protagonizan o calendario da Área de Normalización Lingüística da UVigo para o 2023 deseñado por Luis Davila. Entre os lugares comúns que se reflicten nas viñetas están 'non falo galego porque o falo mal'; 'impóñennos o galego' ou 'o galego só serve para falar coas vacas'.
A exposición Itinerante 'Formas tradicionais da cerámica popular: Terra Chá Bonxe, presenta na Facultade de Xeografía e Historia da USC unha selección de pezas oleiras orixinais do centro produtor de cerámica tradicional de Bonxe para poñer en valor esta forma de artesanía tradicional a través do traballo realizado pola Asociación Ceramolóxica Canaveira e persoal investigador da institución compostelá.
