Actualidad de Sociedad

O titular do Goberno galego, Alberto Núñez Feijóo, destacou hoxe a autorización no Consello da Xunta dun acordo cos sindicatos UGT e CC.OO que cualificou de “histórico” e “moi ambicioso” para a mellora da función pública. A este respecto, Feijóo aseverou que se trata do acordo máis importante acadado no ámbito do emprego público na historia de Galicia. Ábrese así, dixo, unha nova etapa na que o obxectivo será acadar un emprego público de calidade, estable e ben retribuído, que ofreza as mesmas condicións para os profesionais que desempeñen iguais funcións e que recoñeza o esforzo laboral e motive a mellora constante da formación co conseguinte beneficio para a cidadanía.

Aprobouse para a súa remisión ao Parlamento a futura Lei de rehabilitación e de rexeneración e renovación urbanas de Galicia para facilitar a recuperación de centros históricos e núcleos rurais e protexer as edificacións históricas. Esta lei se enmarca no obxectivo de priorizar a rehabilitación fronte ás novas construcións. A norma diferencia dous ámbitos de actuación: a rehabilitación edificatoria; e a rexeneración urbana, referida a actuacións que afectan tanto edificios como tecidos urbanos. Así mesmo, o novo documento axilizará a tramitación para a recuperación de centros históricos e núcleos rurais.

A Cidade da Cultura duplicou o número de visitas no Nadal grazas á exposición Castelao maxistral. A boa obra ao mestre honra —que exhibe por vez primeira en Galicia ‘A derradeira leición do mestre’— e ás actividades para público familiar de Cidade do Nadal, unha urbe máxica con obradoiros, cunha grande para decorar conxuntamente e cun premiado espectáculo familiar. O Gaiás recibiu durante estas festas 7.000 persoas, alcanzando nalgunha destas datas cifras récord ao superar os 800 visitantes por día.

O edificio administrativo do Sergas acolleu as primeiras xuntanzas dos grupos específicos de traballo propostos polo Sergas para adoptar decisións compartidas cos profesionais na reformulación do modelo de atención primaria. Máis de sesenta profesionais, de distintas categorías e de todas as áreas sanitarias, comezaron hoxe a traballar nos distintos grupos co obxectivo de abordar propostas a curto, medio e longo prazo coas que afrontar o reto do envellecemento poboacional e as dificultades para dispoñer de profesionais que afectan ao conxunto do Sistema Nacional de Saúde.

Un total de 17 centros educativos públicos acadaron os premios do V Concurso de Traballos por Proxectos baixo a coordinación da biblioteca escolar, convocados pola Consellería de Educación, Universidade e Formación Profesional para estimular o deseño e desenvolvemento de iniciativas interdisciplinarias ou de investigación nestes espazos. Esta convocatoria enmárcase no Plan LÍA (Lectura, Información e Aprendizaxe) de Bibliotecas Escolares 2016/20, que ten entre os seus obxectivos propiciar a aprendizaxe por proxectos e outras metodoloxías activas, empregando os recursos e servizos da biblioteca.

A Consellería de Sanidade informa que xa se teñen vacinado máis de 548.000 galegas e galegos na campaña "Contaxia a túa enerxía e non a gripe", iniciada o pasado 22 de outubro, e que remata hoxe. Estas cifras amosan un aumento total dunhas 20.000 persoas respecto ao mesmo momento da campaña do ano anterior. Das persoas vacinadas, 386.000 tiñan 65 ou máis anos, unha das poboacións nas que esta vacina está especialmente indicada; o mesmo número de persoas que as vacinadas na campaña de vacinación antigripal do ano pasado.

O Salón Teatro de Santiago de Compostela acolle esta fin de semana a montaxe Os fabulosos cleaners, de Malasombra Producións, a segunda das tres propostas do ciclo Gran Teatro para os Máis Pequenos, organizado polo Centro Dramático Galego (CDG) como unha programación especial de Nadal que combina espectáculos con talleres infantís. A asistencia ás funcións, que terán lugar o sábado 29 ás 19,00 h. e o domingo 30 ás 12,30 h., pode combinarse coas dúas entregas do taller titulado Visto non visto, dirixido a nenos e nenas a partir de tres anos.

Galicia é a sexta comunidade autónoma con menos numero de tarxetas sanitarias (TIS) por médico de familia, segundo datos do Barómetro sanitario de Ministerio de Sanidad, Consumo Bienestar Social. Así, fronte ás 1.357 TIS de media en España, os facultativos galegos teñen asignadas unha media de 1.275, preto de 100 tarxetas menos que a media nacional. No referido ao número de médicos de atención primaria, vense experimentando un aumento constante. Mentres que no ano 2008 había en Galicia 2.402 facultativos, a día de hoxe a cifra é de 2.566, o que implica un crecemento de case un 7% máis.

O Centro Dramático Galego (CDG) organiza por terceiro ano consecutivo o seu ciclo Gran teatro para os máis pequenos para celebrar o Nadal co público infantil na súa sede do Salón Teatro de Santiago de Compostela. A programación especial para estas festas desenvólvese arredor de tres espectáculos das compañías Xarope Tulú, Malasombra Producións e Galeatro, precedidos doutros tantos talleres baixo o lema común Saca a arte que levas dentro e directamente relacionados co que as nenas e nenos verán a continuación no escenario.

O outono galego considerouse moi cálido debido ás elevadas temperaturas rexistradas no mes de setembro. Así se recolle no Informe climatolóxico correspondente á estación, elaborado por Meteogalicia. A temperatura media do outono (meses de setembro, outubro e novembro) -obtida a partir das anomalías medias en once estacións meteorolóxicas representativas, acadou un valor de 15.4 ºC, polo que se rexistrou unha anomalía positiva na temperatura media de +0.96 ºC. Asemade, a chuvia media para as dezaseis estacións que compoñen a serie rexional foi de 394 L/m2., polo que a anomalía media das precipitacións en Galicia foi un 2 % inferior ao valor normal.