Actualidad de Pesca

O conselleiro do Mar, Alfonso Villares, trasladou hoxe ao presidente da Comisión de Pesca do Parlamento Europeo, Pierre Karleskind, a preocupación de Galicia ante a forte deriva medioambientalista da Comisión Europea que se reflicte en restricións á actividade pesqueira como o veto á pesca de fondo decretado o ano pasado en 87 zonas de augas comunitarias e os seus plans para restrinxir máis a pesca de arrastre. Nesta liña, o titular de Mar defendeu a necesidade de que Bruxelas teña en conta a realidade das rexións pesqueiras á hora de lexislar e de tomar decisións que afectan á actividade da frota baseándose en estudos serios e rigorosos.

A Xunta de Galicia acaba de ser recoñecida como parte coadxuvante no recurso presentado pola OPP burelense contra o veto á pesca de fondo decretado o ano pasado pola Comisión Europea en 87 zonas de augas comunitarias. O Tribunal Xeral da Unión Europea emitiu o pasado venres unha resolución na que admite a intervención do Executivo galego no procedemento ao recoñecer que esta prohibición impacta nos intereses da comunidade autónoma. Esta decisión do tribunal europeo supón un fito moi importante posto que poucas peticións deste tipo -presentadas polas rexións europeas- prosperan, e implica que a Administración galega poida participar activamente no proceso.

O conselleiro do Mar, Alfonso Villares, mantivo hoxe un encontro cos presidentes da federación galega e das tres provinciais de confrarías de pescadores (A Coruña, Lugo e Pontevedra) para analizar a situación do sector e os retos máis inmediatos que afronta. Neste primeiro contacto conxunto tralo seu nomeamento, o titular de Mar trasladou aos representantes das confrarías que a nova Lei de ordenación e xestión integrada do litoral de Galicia -que se debate mañá no Parlamento- vai outorgar ás empresas do complexo mar-industria a seguridade xurídica que precisan, e o Goberno central lles nega, para seguir instaladas preto da costa.

O conselleiro do Mar, Alfonso Villares, defendeu hoxe en Baiona a necesidade de rebaixar o IVE dos produtos do mar para reactivar o seu consumo e valorizar o labor esencial do sector pesqueiro como subministrador de alimentos de calidade á cidadanía. Nesta liña, sinalou que esta medida contribuiría a incentivar o movemento do mercado, a aliviar a situación das familias -especialmente as de aquelas con baixos ingresos- e a mellorar as previsións de crecemento económico. Así o expuxo na inauguración do 23 Congreso Aecoc de produtos do mar, onde estivo acompañado polo director xeral de Pesca, Acuicultura e Innovación Tecnolóxica, Antonio Basanta.

O director xeral de Relacións Exteriores e coa Unión Europea, Jesús Gamallo, participou en Bruxelas nun encontro de partes interesadas relacionado co ditame do Comité Europeo das Rexións (CdR) sobre o futuro do sector pesqueiro na Unión Europea, encargado á Xunta. Tralo último encontro da comisión de Recursos Naturais (NAT) do CdR, Gamallo presentou as primeiras liñas deste ditame e intercambiou opinións con rexións vencelladas co sector pesqueiro, así como con outras partes interesadas do sector público e privado.

Tivo lugar hoxe a presentación das primeiras ideas do ditame 'A Política Pesqueira Común sobre o terreo: cara a unhas comunidades costeiras sostibles e resilientes na UE'. A Comisión Europea presentou en febreiro un paquete de catro comunicacións co obxectivo de 'mellorar a sustentabilidade e a resiliencia do sector da pesca e acuicultura na UE'. Entre as medidas propostas, inclúese a prohibición da pesca de arrastre de fondo nas áreas mariñas protexidas. A intención da Xunta é plasmar unha visión rexional que contribúa a acadar un equilibrio entre as dimensións social, económica e medioambiental da Política Pesqueira Común (PPC).

A conselleira do Mar, Rosa Quintana asegurou que é necesario que Bruxelas reflexione sobre as medidas que está a adoptar e os seus efectos tendo en conta malos precedentes de desafección europeísta como a saída do Reino Unido da Unión Europea. Decisións afastadas da realidade como o veto á pesca de fondo aprobado o ano pasado ou os plans para prohibir o arrastre nas áreas mariñas protexidas, incidiu, son exemplos de políticas que prexudican ao sector pesqueiro e provocan a desaprobación dos profesionais do mar.

A Feira Expomar, de carácter bianual, pretende superar as cifras acadadas na última edición –celebrada en 2019, pois en 2021 por mor da pandemia– a cal se converteu na máis concorrida da historia con 135 expositores que representaron a máis de 350 marcas de diferentes países. Este ano, a Xunta de Galicia participa cun posto de 96 metros cadrados onde se ofrecerá información sobre distintas marcas acreditadas como Mexillón de Galicia, Bonito do Norte ou pescadeRías, baixo o paraugas da campaña GALICIA SABE AMAR.

A campaña 'Galicia sabe amar', posta en marcha pola Xunta en 2021, está promocionando os produtos galegos do mar por toda España, dando a coñecer a calidade e versatilidade dos peixes e mariscos para impulsar o seu consumo. Desde o mes de febreiro, diversos municipios españois vinculados cos Camiños de Santiago están coñecendo as bondades dos manxares das rías galegas. Trátase dunha iniciativa posta en marcha pola Consellería do Mar que se materializa en catro foodtrucks rotuladas coa imaxe da campaña que están a realizar outros tantos percorridos pola xeografía española para ofrecer un total de arredor de 1.000 degustacións de produtos do mar de orixe galego nuns 260 municipios (con estancia de entre un e tres días en cada un deles tanto en horario de mañá como de tarde), cun alcance potencial de 13 millóns de persoas.

O sector do mar de Galicia acadou un récord en 2022 no campo das exportacións, ao superar os 2.700 millóns de euros de facturación. A comercialización internacional de produtos do mar é unha oportunidade para o crecemento do sector fronte á crise de prezos actual que se engade ás dificultades vividas pola pandemia da covid-19 ou a guerra en Ucraína, que afecta ao acceso a determinadas materias primas. Neste ámbito está a darse unha tendencia crecente nos últimos anos, pois desde 2017 -exercicio no que se rompeu o teito dos 2.000 millóns de euros de facturación- os datos non baixaron desa cifra.