Noticias

Os orzamentos da Xunta para 2016 inclúen a rebaixa fiscal máis importante da historia da autonomía

Co deseño dos orzamentos para 2016, a Xunta de Galicia prioriza as estratexias económico-sociais para a segunda parte da década, onde o emprego, o benestar social, sectores prioritarios da economía e a cultura e o entorno dixital concentran as liñas de acción básicas. A Xunta disporá o vindeiro ano de 430 millóns de euros máis, polo incremento dos ingresos e polo aforro nos xuros da débeda.

A rebaixa fiscal será a máis importante da historia da Autonomía. Entre outras medidas, os Orzamentos da Xunta para 2016 incluirán beneficios fiscais para familias, fogares e empresas por un importe de 364 millóns de euros, o que supón un aumento do 13,3% respecto ao actual exercicio. Os beneficios fiscais son unha estimación do impacto sobre os tributos autonómicos das medidas de política económica e social da Xunta. Os beneficios fiscais aumentan un 13,3% e chegan ata os 364 millóns de euros, o que permitirá incrementar a renda dispoñible das familias galegas. Do total de beneficios fiscais en 2016, preto do 90% son beneficios de carácter social. Ademais, a previsión macroeconómica do Goberno galego inclúe unha revisión á alza da taxa de PIB para 2016 e unha baixada de 1,8 puntos na taxa de paro.

Estes Orzamentos teñen, ademáis, como prioridade a aposta polo emprego e o aumento dos investimentos, ao tempo que reforzan o gasto social e reducen o déficit e a débeda. Ademais, isto coincidirá cunha aceleración da recuperación económica –o PIB galego medrará en 2016 un 2,5%, unha décima máis do estimado-, mentres que a taxa de desemprego seguirá baixando e reducirase case dous puntos.

Polo que se refire ao gasto social, a Xunta elévao en 282 millóns dos que preto de 200 irán destinados a sanidade e educación. Galicia destinará en 2016 324 millóns no capítulo de Dependencia, e eleva a 53 millóns a partida da RISGA. E porá en marcha medidas como a achega de 100 euros por neno nado a partir do 1 de xaneiro e o Servizo de axuda no fogar. No tocante ás melloras no tecido industrial, os Orzamentos para 2016 elevan un 14% os investimentos, que chegan aos 1.417 millóns de euros, e destinan 100 millóns no apoio á industrialización e a internacionalización, mentres que as partidas para crecemento intelixente aumentan un 8,1%. O Goberno galego eleva un 15% as partidas para políticas activas de emprego, prestando especial atención a colectivos como os emprendedores ou os parados de longa duración.

En sectores estratéxicos da economía galega, como o ámbito rural, a Xunta completa un programa de impostos cero para favorecer a actividade neste eido. Así, ningunha transmisión de fincas en solo rústico pagará imposto de transmisións patrimoniais; deixará de tributar a transmisión ou ampliación de explotacións agrarias; e as agrupacións de fincas rústicas tampouco tributarán en AXD. No IRPF, aplicarase unha rebaixa de carácter progresivo que vai beneficiar ao 98,5% dos contribuíntes galegos, cun aforro de ata 380 euros ao ano. Esta rebaixa será maior nas rendas baixas e medias, e situará Galicia entre as comunidades coa menor tributación. En canto ao Imposto sobre Sucesións, desde o 1 de Xaneiro de 2016, a Xunta elevará a 400.000 euros o mínimo exento de tributación para que o 99% dos galegos non paguen este imposto cando herden como fillos, pais, avós, netos ou cónxuxes, e o 1% restante pagará menos.

APOSTA POLO REEQUILIBRIO TERRITORIAL

A Administración galega investirá 725 euros por habitante en Lugo e 688 euros en Ourense, seguidos dos 502 na Coruña e os 460 de Pontevedra. O obxectivo é afondar no reequilibrio territorial entre as provincias orientais e as atlánticas.

As de 2016 serán as primeiras contas expansivas da Administración galega dende 2008, de xeito que a Xunta disporá o vindeiro ano de 430 millóns de euros máis que no actual exercicio, o que permitirá elevar os investimentos produtivos e trasladar a recuperación económica a todos os fogares a través de novas medidas sociais e baixadas de impostos. O gasto non financeiro situarase en 8.804 millóns de euros, un 4,3% máis. En canto ao gasto por consellerías, os departamentos con máis dotación son Sanidade (3.513 millóns) e Cultura, Educación e Ordenación Universitaria (2.249). Política Social contará con 620 millóns, e Medio Rural terá 505, mentres que o resto distribúese entre Economía, Emprego e Industria (403); Infraestruturas e Vivenda (340); Vicepresidencia e Consellería de Presidencia, Administracións Públicas e Xustiza (253); a Presidencia da Xunta (169); Mar (129); Medio Ambiente e Ordenación do Territorio (109) e Facenda (53).

PLAN ESTRATÉXICO 2015-2020

Os Orzamentos da Xunta para 2016 conectan os eixes prioritarios do Plan Estratéxico 2015-2020 e dan prioridade ás políticas sociais contempladas de xeito preferente no eixe 1 (empregabilidade e crecemento intelixente) e o eixe 2 (benestar e cohesión social) que concentran máis de 7.000 millóns de euros. O eixe 3 (crecemento sustentable, territorio, mar, agricultura, gandería e montes) contará con 933 millóns, e o eixe 4 (sociedade dixital, lingua e cultura) terá 434 millóns. Ao eixe instrumental –administración moderna, eficiente e de calidade- asígnanse 179 millóns de euros.

O documento íntegro sobre os orzamentos pódese consultar neste enlace.