Noticias

El PPdeG reivindica que no se utilice un discurso del miedo y el BNG apoya a NÓS-Candiatura Galicia para lograr representación

Nota de prensa del Gabinete de Comunicación del PPdeG:

O presidente do PPdeG, Alberto Núñez Feijóo, sinalou que nestas eleccións non fai falta empregar ningún discurso do medo porque este país xa recobrou a esperanza e o futuro.

O líder dos populares galegos participou no acto de presentación da candidatura dos populares pola provincia de Pontevedra para o Congreso e o Senado con motivo das vindeiros eleccións xerais. Alí, lembrou que custou moito chegar ata o punto no que nos atopamos e animou a seguir avanzando.

Nesta liña, asegurou que as listas tratan de representar un pobo que leva anos loitando contra a crise, ao igual que os candidatos que as compoñen. Así, o mandatario recordou o importante labor levado a cabo para que o esforzo da xente non se volvera desperdiciar e puxo en valor o traballo realizado por todos os deputados e senadores.

Para o presidente do PPdeG, as listas dos populares contan con renovación grazas a persoas decididas a involucrarse e á xenerosidade dos que dan paso ás novas incorporacións. Ao mesmo tempo, fixo fincapé en que os populares tamén renovan as listas con solidez, experiencia política e experiencia de xestión.

Así, Feijóo apuntou que a unidade que non acadaron a esquerda e o nacionalismo atópase nas listas do PP xa que, por riba de personalismos e nomes propios, os populares si teñen unha idea e un proxecto de país.

Alberto Núñez Feijóo sinalou que nas listas do Partido Popular hai certezas de gobernabilidade posto que forman equipos para gobernar, para xestionar e para facer que as prioridades políticas sexan as mesmas que as da xente: o emprego e a economía.

Como engadiu o líder dos populares galegos, todo o mundo sabe que se o PP gaña as eleccións, ao día seguinte dos comicios Rajoy gobernará, tomará decisións e o país seguirá pola senda do crecemento. Pola contra, ninguén sabe qué sucedería con calquera dos outros candidatos.

Ademais, aproveitou a súa intervención para recordar que a España lle foi mellor con Rajoy que con Zapatero, posto que os populares taparon os buracos económicos que deixou; despexaron o risco de rescate; e lograron que a economía volva crecer e que se volva a crear emprego. Con respecto a isto, dixo que, malia que hai socialistas que recoñecen isto, descoñece socialistas que sexan capaces de dicir en qué é mellor Pedro Sánchez que Zapatero.

Para Feijóo, os populares teñen un proxecto co que España xirou e que teñen que culminar e advertiu de que perder a estabilidade destes anos de ter un goberno con capacidade de decisión é un retroceso que o país non se pode permitir.

Con respecto a isto, o presidente indicou que os populares non poden conformarse co que din as enquisas sobre que o PP será o primeiro partido pois eles non poden conformarse con resultados que outros partidos celebrarían con euforia.

Segundo Feijóo, o PP ten que seguir mellorando para conseguir unha maioría ampla posto que é boa para a estabilidade do país. Así, non poden simplemente gañar senón que teñen que garantir a gobernabilidade en beneficio dos españois e, por iso, teñen que traballar para que a súa maioría sexa o máis ampla posible.

Xa para concluír a súa intervención, o líder do PPdeG salientou que os populares teñen feitos, experiencia, ganas, ilusión e un gran equipo e candidatos que non deixará de mostrar que hai unha guía para continuar pola dirección necesaria.

Nota de prensa del Gabinete de Comunicación del BNG

O BNG amosou o seu público apoio a NÓS-Candidatura Galega por ser a única opción política de país que non está contruída arredor dunha forza estatal e, nese sentido, considera que non compite polo mesmo espazo que a candidatura liderada por Podemos en Galiza.

“Disputamos o espazo da representación de Galiza, da xente que quere unha alternativa de país feita desde aquí frente ás demais alternativas construídas arredor dos proxectos das forzas estatais”, explicou o portavoz nacional, Xavier Vence, polo tanto, “NÓS dispútalle o espazo electoral ás candidaturas de obediencia estatal porque aposta porque Galiza teña voz soberana en Madrid”.

Neste sentido, Vence salientou que o país non precisa “deputad@s que, de forma silenciosa, vaian engordar os grupos parlamentarios das forzas estatais”.

“Non queremos deputad@s apretabotóns ao servizo das consignas do grupo parlamentario da forza estatal de turno, senón representantes que batallen desde o primeiro día e con mans libres para defender os intereses de Galiza, capaces de negociar coas outras forzas en nome da maioría social deste país con total liberdade”, recalcou Vence en resposta aos medios.

BNG e as outras catro forzas políticas integradas en NÓS-Candidatura Galega, -PG, CG, Foga e PCPG-, xunto coa Plataforma Iniciativa pola Unión, compareceron para expresar o seu apoio á que reivindicaron como a única candidatura construída “desde aquí”, tras un proceso de primarias cuxo resultado se repectou escrupulosamente, e no que participaron máis de 6.000 persoas, militantes ou cidadáns sen adscrición algunha.

“É a suma de vontades da xente que ten un compromiso de país ante unha situación de emerxencia”, resumía Manuel Suárez, presidente do Partido Galeguista, mentres que a portavoz de IpU, Elvira Souto agradeceu a participación de todas as persoas que se implicaron no proceso de elaboración dunha candidatura de confluencia.

“NÓS-Candidatura Galega quere representar á cidadanía que no se resigna a ser sistematicamente traizoada polas forzas políticas estatais que lle dan as costas a Galiza en Madrid”, concluíu Vence.

Fotografía: PPdeG