sábado, 7 de noviembre de 2026
Nota de prensa del Gabinete de Comunicación del BNG:
O Grupo parlamentario do BNG concentrado ás portas do Parlamento galego pide a dimisión do Presidente da Deputación de Ourense, José Manuel Baltar. O grupo parlamentario do BNG exhibe un cartaz baixo o lema Baltar dimisión, Feijóo cómplice ante as portas do Parlamento galego, minutos antes de dar comezo a sesión plenaria na que o BNG non pode formular a pregunta ao Presidente pola reforma do regulamento da Cámara.
O portavoz do grupo parlamentario, Francisco Jorquera acusou ao Presidente da Xunta de actuar como encubridor dun caso de acoso sexual e violencia machista e esixiu, que como Presidente da Xunta e do Partido Popular de Galicia, inicie os trámites para a expulsión de Baltar e a súa dimisión como Presidente da Deputación.
Jorquera explicou que as gravacións demostran claramente que Baltar solicitou favores sexuais a cambio de promesas de colocación na Deputación de Ourense, onde, por outra parte, dixo, son habituais as prácticas de nepotismo. O parlamentario lembrou as declaracións do Presidente da Xunta nas que afirmaba que unha muller quixo que Baltar delinquise e non delinquiu, manifestacións que ao seu entender, sitúan a Feijóo como cómplice dun caso de acoso sexual. O deputado esixiu ao Presidente da Galiza e Presidente do Partido popular de Galiza que rectifique e deixe de ser cómplice e encubridor dun caso evidente de violencia machista.
A resposta de Feijóo ás preguntas formuladas polo Grupo Mixto, AGE e PSOE relacionadas coa denuncia contra o Presidente da Deputación de Ourense provocaron o abandono dos grupos da oposición do hemiciclo. O BNG mostrou a súa indignación pola resposta de Feijóo que comezou a súa intervención argumentando que para el o problema máis importante de Galiza é o desemprego.
Tras o abandono do hemiciclo, a deputada do BNG, Carme Adán asegurou que tiña moi claro que a denuncia contra Baltar esixía a súa dimisión pero despois de escoitar ao Presidente da Xunta Feijóo tamén debe dimitir, recalcou. Pola súa parte, o portavoz do grupo parlamentario, Francisco Jorquera tachou de insultante a resposta do Feijóo que acusou de frivolidade á oposición por traer á Cámara unha pregunta sobre violencia machista. Para Jorquera, Feijóo demostrou hoxe que para el a violencia machista non é un problema importante e con esta actitude insulta ao 50% da poboación e pon en evidencia que considera irrelevante a violencia machista. Feijóo quedou hoxe retratado, concluíu.
Fotografía: Gabinete de Comunicación del BNG
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
