miércoles, 12 de agosto de 2026
Nota de prensa del Gabinete de Comunicación del PSdeG:
O secretario xeral do PSdeG-PSOE, José Ramón Gómez Besteiro, criticou que con Feijóo Galicia mingua tamén no exterior. Así o dixo logo dun encontro en Santiago coa directiva da Casa Galicia de Bos Aires, no que subliñou que Feijóo traslada a súa Galicia minguante, que reduciu o 13% da súa poboación activa, tamén á política exterior.
O líder dos socialistas galegos chamou a impulsar a relación fraternal e de agarimo dos socialistas coa diáspora en Arxentina e toda América Latina para recuperar as pontes de encontro desatendidas polo goberno galego. Advertiu que a despreocupación do presidente galego supón a perda de oportunidades, de capacidade de influencia, de relacións comerciais e de efectivos no exterior.
Instou a recuperar o impulso que desenvolveu o presidente Touriño en Arxentina e América Latina e apelou ás razóns culturais e de patrimonio para reactivar os lazos de Galicia con esta rexión e o seu papel como cabeza de ponte en clave de recuperación da Comunidade Autónoma e do poder económico no exterior.
Apelou á xestión da política exterior do propio Touriño e mesmo do ex presidente do PP e do goberno galego, Manuel Fraga, aos que non lles pasaría desapercibida a situación de América Latina. Sinalou así ás oportunidades que se abren tanto con Arxentina como con Cuba ou mesmo Uruguai e outros países cos que tivemos tradicionalmente unha relación extraordinaria.
O presidente da Xunta camiña, dixo, no sentido contrario da expansión política e económica de Galicia, cara á Galicia minguante, repetiu, como demostra que utilice as comparativas de creación de emprego en base á caída da poboación activa, o que ofrece un signo moi perigoso de cara onde avanza Galicia.
Gómez Besteiro trasladoulle ao presidente do Centro Galicia, José María Vila, o compromiso de Pedro Sánchez de afrontar a modificación do voto rogado co obxectivo de compaxinar as garantías legais co impulso á participación.
Lembrou que foi o propio secretario xeral do PSOE o que no último Comité Federal asumiu o compromiso de modificar a lexislación electoral para resolver os requisitos legais co fomento da participación.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
