domingo, 8 de noviembre de 2026
Nota de prensa del Gabinete de Comunicación del PSdeG:
O secretario xeral do PSdeG-PSOE, José Ramón Gómez Besteiro, sinalou que os Orzamentos da Xunta para o ano 2016 non son os últimos da Lexislatura, son os primeiros da campaña electoral. Criticou así unhas contas electoralistas carentes de credibilidade e sen medidas dirixidas a superar a crise económica e impulsar o emprego.
O líder dos socialistas galegos advertiu que o presidente da Xunta fracasa na elaboración duns Orzamentos que deberan estar dirixidos a cambiar a vida das persoas e responder ás súas ansias e retos de futuro. Sinalou que o compromiso de crear 18.000 postos de traballo no próximo ano non parece unha oferta moi boa cando apenas supoñen o 10 por cento do emprego que destruíu dende 2009.
Gómez Besteiro puxo o foco sobre as 250.000 persoas que queren e e non poden traballar en Galicia, e ás que o goberno galego non ofrece ningunha solución de futuro. Sinalou que a estes desempregados e desempregadas non lles interesan os anuncios de rebaixas fiscais porque pola súa situación non poden pagar impostos.
Advertiu ademais que o crecemento estimado polo goberno galego, do 2,5 por cento, continúa sendo inferior ao previsto para o resto do Estado, co que o goberno galego tan só pode continuar ensanchando a diverxencia con España e Europa. Os orzamentos deixan a Galicia entre as comunidades autónomas que menos medran e ademais lastrados por un gasto en débeda equivalente a unha terceira Consellería.
En suma, unhas contas que en lugar de romper co ciclo da austeridade e xerar oportunidades de emprego e responder ás necesidades das familias o único que conseguen é realizar unha emenda á totalidade das políticas de Feijóo. Unhas contas carentes ademais de credibilidade, xa que o nivel de execución orzamentaria no pasado ano estivo un 5 por cento por debaixo da media das comunidades autónomas.
O responsable socialista criticou que os orzamentos do goberno galego renuncien a aportar medidas dirixidas a axudar aos galegos e galegas, limitándose a ofrecer unha mala copia do cheque bebé que Feijóo lle criticara a Zapatero. Sinalou que a día de hoxe non sabemos nin quen o vai recibir, si vai durar só ata as eleccións ou si se limita a unha burda oferta electoral.
Optimismo preelectoral
O portavoz do Grupo Socialista, José Luis Méndez Romeu, criticou que os orzamentos padecen un optimismo preelectoral e expansión artificial para acadar un crecemento anémico de Galicia. Apuntou a unhas previsións de crecemento irreais o ano pasado equivocáronse en mais da metade- e presumen de expansivos cando medran 900 millóns menos que en 2009, e mantéñense por debaixo das contas de 2014.
O portavoz socialista criticou que o crecemento económico corresponde a unha manobra preelectoral de Montoro, que adía pagos e inxecta transferencias para afrontar as eleccións xerais cunha aparencia de crecemento económico.
Criticou que unha das partidas que mais medran sexan precisamente os gastos inmateriais en publicidade e propaganda un 11 por cento-, o que da a medida do seu carácter electoral. Mentres, os gastos en investimento van ser inferiores aos de 2012 e apenas a metade dos de 2009, ademais de que o 80 por cento corresponde ao funcionamento operativo dos servizos, limitando o investimento novo a apenas o 20 por cento.
O gasto social suporá o 65 por cento do orzamento global, cinco puntos menos do 70 por cento dos orzamentos de 2009 e, a pesares de que tódalas partidas medran, destinan 1.200 millóns de euros menos que cando chegou Feijóo ao goberno galego.
Méndez Romeu puxo o acento sobre o escaso nivel de execución do goberno galego, que o ano pasado apenas supuxo dous terzos do orzamento para políticas de emprego, e a outubro apenas leva un 25 por cento do total previsto. O Igape mantense nun escaso 9 por cento, cando o ano pasado deixou sen executar o 30 por cento do seu orzamento.
As partidas de gasto aumentan, dixo, por inercia administrativa e en ningún caso polas novas políticas estratéxicas que indiquen as prioridades e permitan cambiar a pauta de crecemento económico. Nin as políticas activas de emprego nin por exemplo as partidas para inclusión social, dixo, rexistran ningún avance significativo.
O parlamentario socialista criticou advertiu que o próximo venres comeza a rolda de comparecencias no Parlamento, da que o PP e o goberno galego excluíron aos responsables dos principais organismos investidores de Galicia, como a Axencia de Infraestruturas, Augas de Galicia ou mesmo o Igape.
Fotografía: Gabinete de Comunicación del PSdeG.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
