domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
O conselleiro de Facenda, Valeriano Martínez, avanzou que os Orzamentos da Xunta para o exercicio 2016 incluirán un importante crecemento dos investimentos públicos, que medrarán no entorno dun 14% respecto ao actual exercicio. Este incremento plasmarase nas contas autonómicas, que se aprobarán o vindeiro luns no Consello da Xunta.
O titular de Facenda mantivo un encontro con representantes das organizacións sindicais CIG, UGT e CC.OO., para trasladarlles as liñas principais dos Orzamentos da Xunta para o vindeiro exercicio. Ademais, Valeriano Martínez mantivo tamén un encontro con representantes da Confederación de Empresarios de Galicia (CEG).
O conselleiro sinalou que os Orzamentos da Xunta para 2016 terán como principal obxectivo trasladar a recuperación económica a todos os fogares galegos, e para iso van incluír a rebaixa de impostos máis importante da historia da Autonomía. Esta baixada fiscal incidirá principalmente nunha rebaixa do tramo autonómico do IRPF, do Imposto sobre Sucesións e Doazóns e nunha diminución de impostos no ámbito rural.
O titular de Facenda tamén dixo que outra das prioridades será potenciar o investimento produtivo. Galicia foi no último ano a terceira comunidade autónoma que fixo máis esforzo investidor nas súas contas, pero o obxectivo no vindeiro exercicio é impulsar este ámbito e por iso no 2016 os investimentos da Xunta de Galicia van medrar no entorno do 14% respecto a 2015.
Ademais, Valeriano Martínez incidiu en que as contas do vindeiro exercicio terán como prioridade a creación de emprego. Neste sentido, lembroulles aos representantes sindicais e da CEG que dende o inicio da lexislatura o paro rexistrado reduciuse en Galicia en 63.000 persoas, e avanzou que os Orzamentos tamén van incidir no fomento do emprego.
O conselleiro estivo acompañado pola secretaria xeral técnica e do Patrimonio da Consellería de Facenda, María del Socorro Martín, e polo director xeral de Planificación e Orzamentos, Miguel Corgos.
Fotografía: Gabinete de Comunicación de la Xunta de Galicia
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
