martes, 7 de abril de 2026
Nota de prensa remitida por el Gabinete de Comunicación de la Xunta de Galicia:
As diversas posibilidades que ofrecen os videoxogos a prol da aprendizaxe, a comunicación ou a información centran a xornada Xogar tamén é cousa seria. Experiencias na creación de videoxogos en Galicia que ten lugar o 30 de xuño no auditorio da Biblioteca e Arquivo de Galicia, na Cidade da Cultura.
Promovida pola Consellería de Cultura e Educación, a través da Secretaría Xeral de Cultura, co apoio da Agadic e do Igape, a iniciativa preséntase como un espazo de encontro para compartir experiencias creativas de empresas e de administracións públicas que utilizan os xogos dixitais para mellorar os seus proxectos e servizos.
A partir de diversos casos encamiñados a acadar diferentes obxectivos, como a produtividade empresarial, as vendas, a formación, a saúde ou a educación, a xornada busca achegarlle a industria do videoxogo en Galicia a novos sectores para dar a coñecer a súa potencialidade, así como contribuír á visibilidade deste sector creativo.
Esta iniciativa, que tamén abordará a situación actual e futuro dos videoxogos en Galicia, está dirixida especialmente a xerentes, directores, responsables de departamentos de comunicación, de recursos humanos ou de publicidade de empresas de Galicia, así como a persoal das administracións públicas, responsables de centros de formación, grupos de investigación ou novos emprendedores de solución tecnolóxicas interesados en coñecer e afondar na potencialidade da tecnoloxía dos videoxogos.
Para realizar unha aproximacións as vertentes tecnolóxico-creativas dos xogos dixitais e aos resultados da súa aplicación na creación de materiais, na xornada presentaranse recursos destinados ao campo sanitario, con programas para exercitar a cognición social e informar sobre hábitos sexuais saudables; ao educativo, con ferramentas vinculadas coa reciclaxe e o cambio climático; ou ao empresarial. Ademais, tamén haberá unha mesa redonda onde profesionais de Ficción Producciones, de Iberian Games, de A Meiga e de imaxin|software ofrecerán a súa visión desde o punto de vista dos desenvolvedores.
O programa da xornada, coordinada por imaxin|software, está accesible na páxina web da Secretaría Xeral de Cultura, en www.cultura.gal, e a inscrición é gratuíta, a través do enderezo electrónico videoxogos@imaxin.com.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
