miércoles, 12 de agosto de 2026
Nota de prensa del Gabinete de Comunicación del PSdeG:
O portavoz do Grupo Socialista, José Luis Méndez Romeu, confirmou que o secretario xeral do PSdeG-PSOE, José Ramón Gómez Besteiro, será proposto polo Grupo Socialista como senador por designación autonómica en substitución de Paula Fernández. Así o dixo logo da Xunta de Portavoces que tivo lugar hoxe no Pazo do Hórreo. No Pleno Extraordinario, previsiblemente instantes antes do Pleno ordinario no que será votada a proposta de Besteiro como senador autonómico. Galicia conta con tres senadores designados polo Parlamento, dos que dous son propostos polo PP como grupo maioritario e outro polo PSdeG, principal grupo da oposición.
Méndez Romeu salientou o momento axeitado para executar o relevo no Senado na persoa de quen dirixe o PSdeG nas catro provincias galegas, así como fronte ao resto do Estado e diante de tódalas institucións de Galicia. Advertiu motivos de abondo para que quen ten esta posición interna teña tamén unha presenza institucional destacada e que todo o socialismo galego estea representado no Senado. O responsable socialista valorou tamén o desbloqueo da renovación en diversos órganos institucionais, como é o Valedor do Pobo, por canto o actual titular leva tres anos en funcións á espera dun novo nomeamento, ou o Consello de Contas, funcionando con tan só 3 dos 5 representantes polo bloqueo do PP.
Tamén chamou a iniciar canto antes a aplicación da Lei dos medios públicos, o que implica o debate e aprobación do Mandato Marco e a remuda dos membros do Consello de Dirección. O Pleno ordinario comeza co debate final da Lei de dereitos e dignidade dos enfermos terminais, presentada e impulsada polos socialistas galegos e que ven de acadar un amplo consenso logo do seu traballo intenso e construtivo de tódolos grupos parlamentarios no debate en Ponencia e Comisión.
Méndez Romeu salientou que a norma permitirá innovar o ordenamento xurídico galego, que quedará situado á vangarda ao consolidar o respaldo aos profesionais sanitarios que atenden ás persoas en situación terminal, uns doentes que grazas a esta norma ven ordenado o seu sistema de dereitos e garantías. O responsable socialista lamentou que o grupo maioritario desestimara a solicitude de habilitar o mes de xullo para celebrar sesións ordinarias de Pleno e comisións na liña da proposta de reforma do Regulamento presentada polos socialistas galegos.
Tampouco estimaron oportuno apoiar as solicitudes de comparecencia presentadas polo PSdeG, que reclamaba a presenza de Feijóo para dar conta da situación do mercado de traballo galego. Si que terá lugar un debate sobre unha proposición non de Lei do PSdeG para aumentar a cobertura de desemprego logo de que 40.000 galegos e galegas perderan as súas axudas ao quedar sen traballo. Tamén rexeitaron a comparecencia do goberno galego para dar conta da situación da Fundación Camilo José Cela logo da imputación dos seus directivos e varios dos membros do Padroado que hoxe ostentan cargos institucionais relevantes e do que a día de hoxe sorprendentemente ninguén ofreceu unha mínima explicación. O asunto será tratado sen embargo como pregunta oral no Pleno.
Nota de prensa del Gabinete de Comunicación de AGE:
Alternativa Galega de Esquerda (AGE), a través da súa viceportavoz Yolanda Díaz, denuncia novos pactos tácitos das forzas políticas maioritarias, das forzas políticas do réxime. Díaz refírese aos acordos entre Partido Popular e PSdeG, comunicados aos demais grupos da oposición na xunta de portavoces parlamentarios desta mañá, e que atinxen á escolla dun novo senador por designación autonómica, á nova persoa será Valedor do Pobo ou á renovación do Consello de Contas. Manifestamos a nosa sorpresa polos pactos tácitos das forzas do réxime, afirmou a viceportavoz de AGE na posterior comparecencia de prensa, na que encadrou o asunto no baleirado do Parlamento ao que procede un réxime político empresarial que esboroa.
Na estratexia do Partido Popular, da man en non poucas ocasións do PSdeG, entra igualmente a redución de iniciativas da oposición nos plenos do Parlamento de Galicia. Seguimos en tempada de retalladas, expuxo Yolanda Díaz. Alternativa Galega de Esquerda disporá dunha proposición non de lei menos e carecerá de interpelación.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
