miércoles, 12 de agosto de 2026
Nota de prensa remitida por el Gabinete de Comunicación del BNG:
O BNG contribuíu de xeito decisivo a que o PP teña a menor representación municipal en toda a historia da democracia, desprazando ao partido de Feijóo en 72 concellos, 30 baixo bastón de mando nacionalista, doce en cogoberno con outras forzas e no resto facilitando unha alternativa ao PP. Ábrese unha ventá de cambio nos concellos e un tempo de transformación profunda en tres deputacións e na Fegamp, resumía o portavoz nacional, Xavier Vence, como antesala de futuras derrotas dos populares.
De xeito inmediato, anunciou unha primeira xuntanza de todos os alcaldes e alcaldesas do Bloque e dos máximos responsables políticos do BNG nos gobernos de coalición para visualizar o arranque dunha nova lexislatura comprometida cos máis necesitados, coa dinamización económica e social e coa cultura e lingua propias.
Vence tamén avanzou que, tras os primeiros contactos, seguirá a negociación con todas as forzas políticas alternativas ao PP para lograr un programa de goberno transformador das deputacións, citando expresamente ao PSOE e as candidaturas de Marea Atlántica na Coruña, Compostela Aberta en Santiago e Alternativa dos Veciños en Oleiros.
Esperamos que todas as forzas políticas que nos seus programas levaban a reforma local se comprometan nesa tarefa de reformar as deputacións, e propoñemos negociar con todas elas un plan de transformación en profundidade previo a calquera acordo do seu organigrama e de distribución de cargos, explicou Vence.
O dirixente nacionalista subliñou que son tempos de cambio, non de prolongar rutinas do pasado e, neste sentido, a prioridade é acadar un programa transformador.
Máis alá de reparto nun organigrama de goberno o que compre é poñerse de acordo nun programa de reforma das deputacións para convertelas en institucións eficientes, camiñando cara a súa desaparición a favor dos concellos. Ten que haber un plan estratéxico para estes catro anos e sen ese acordo para adelgazar e transformar as deputacións non ten sentido acordar entrar no goberno das mesmas, explicou Vence.
Logrado ese pacto, Vence tamén salienta que o Bloque está disposto a asumir as responsabilidades de goberno que lle correspondan, sen descartar ningunha posibilidade como a de presidir a Deputación da Coruña.
Preguntado por futuras alianzas para os comicios xerais, Vence reiterou que o obxectivo do BNG nesa cita electoral é acadar para Galiza grupo parlamentario propio no Congreso que teña como único referente a defensa dos intereses estratéxicos do país, sen supeditación a ningún grupo parlamentario de ningunha forza política estatal.
Para iso, insiste, o Bloque está disposto a renunciar as súas siglas en aras dunha gran coalición galega, unha candidatura de amplo espectro con personalidade xurídica propia, que sume a todas as forzas políticas que compartan ese obxectivo de acadar grupo propio para representar a Galiza no Congreso con plena soberanía.
Todas as persoas, cidadanía ou forzas políticas que queiran sumar para conformar esa gran candidatura galega en clave de país, para o BNG son socios posibles. Non hai exclusións a priori de ningún partido ou siglas e todos os que comparten estes obxectivos se podan integrar, reiterou Vence, todos os que queremos reafirmar que Galiza é unha nación temos que sumar forzas para lograr a máxima representación no Congreso para que o noso país conte.
Unha alternativa inclusiva de todos aqueles que sexan capaces de poñer os intereses de Galiza por riba dos intereses partidarios, subliñou o portavoz nacional, tras lembrar que esta é unha demanda que xa se formula desde a propia sociedade civil.
Fotografía: archivo GD/BNG/PSdeG
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
