domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
A conselleira de Traballo e Benestar, Beatriz Mato, ratificou o seu compromiso de seguir apostando por unha formación de máxima calidade e orientada ao mercado laboral na entrega de diplomas a 235 alumnos e alumnas que participaron nun dos 18 cursos da Fundación Laboral da Construción, que financiou o departamento autonómico con 1,25 millóns de euros. En concreto, a formación tivo lugar en cinco centros, en Teo, Arteixo, Vigo, Lugo e Ourense.
Mato destacou que os alumnos e alumnas, ademais de recibir estes diplomas, conseguen un certificado de profesionalidade, un documento de validez nacional que leva aparellado unha importante mellora no curriculum e, polo tanto, na súa empregabilidade o que, segundo destacou a conselleira, aumenta a produtividade e competitividade do tecido empresarial. Mato subliñou que canto maior formación teñan os traballadores e traballadoras maiores serán as súas oportunidades de emprego.
A titular de Traballo avogou por unha formación de calidade que conte cos mellores docentes e as mellores instalacións e que, ademais, estea homologada e vinculada a un certificado de profesionalidade. Neste senso, lembrou que nos últimos anos case 50.000 galegos e galegas obtiveron un destes certificados. En 2015, ademais, a práctica totalidade das actividades formativas financiadas pola Consellería están vinculadas á obtención dun destes documentos. Este compromiso tennos situado á cabeza de todas as autonomías en formación certificada, apuntou.
Así mesmo, Mato recordou que este ano as axudas da Consellería á formación permitirán que se beneficien máis de 15.000 alumnos e alumnas. Entre outras liñas de subvencións destacan a orde de cursos para desempregados impartidos por entidades acreditadas; a formación que se imparte en centros propios da Consellería; a través dun convenio coa Consellería de Cultura, Educación e Ordenación Universitaria; ou a formación en idiomas, TICs e certificados de profesionalidade que se ofrecerán aos participantes dos novos plans de emprego da Xunta de Garantía Xuvenil, dirixido a menores de 25 anos, e do Programa Activa, destinado a parados de longa duración. En total, a Consellería de Traballo e Benestar destina este ano á formación 40 millóns de euros, un 20 por cento máis que en 2014. O pasado ano, só na provincia da Coruña, o departamento autonómico financiou 185 cursos para desempregados que contaron coa participación de 2.775 alumnos e un orzamento de máis de 10 millóns de euros.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
