sábado, 7 de noviembre de 2026
Notas de prensa del Gabinete de Comunicación del PPdeG:
O presidente do PPdeG, Alberto Núñez Feijóo, sinalou que Elena Muñoz comparte rasgos e valores con moitos políticos democráticos que son rigorosos, carecen de estridencias e respectan ao seu pobo. Así se expresaba o dirixente popular na presentación da candidata do PP á Alcaldía de Vigo no almorzo informativo organizado por Nueva Economía Fórum-Tribuna Galicia. Alí, o presidente do PPdeG engadía que, nese tipo de presentacións, adóitase destacar as particularidades do protagonista, aquelas que o fan singular, pero no caso de Muñoz, a súa gran virtude é precisamente a de ter moitos políticos homólogos no mundo democrático.
Deste xeito, Feijóo comparou á candidata popular co tipo de político que construíu o soño da Unión Europea, conciliando libertade, pluralismo e benestar. Segundo engadiu, é imposible atopar entre os grandes pais do europeísmo a persoeiros desgarrados, a demagogos desatados ou a líderes insolentes que utilicen as súas sociedades como cocteleiras que se axitan constantemente. No seu lugar, toma protagonismo o político que fai do rigor o mellor compromiso cos seus cidadáns.
Nesta liña, o líder do PPdeG fixo fincapé en que o perfil de dirixente xestual tampouco tivo lugar na xeración política que protagoniza a Transición democrática. Como matizou, aquel proceso foi posible porque aqueles homes e mulleres deixaron atrás a política falsamente apaixoada. De feito, destacou que palabras como conciliar, aliar, unir, foron os lemas que inspiraron os grandes momentos de Europa, de España e de Galicia e, así, movendo a esas sociedades, transformando a súas inquedanzas en actos e decisións, houbo políticos como Elena Muñoz.
Como destacou Feijóo, Muñoz aporta a Vigo todo aquelo que o Goberno local actual non lle ofrece pero que a cidade merece e que xa é habitual nesa Europa das ciudades que progresan con políticas realistas e eficaces. Con respecto a isto, o dirixente popular destacou que o modelo de político que en Vigo encarna Muñoz, enfróntase en todo o mundo democrático a fenómenos populistas que, en realidade, non nacen do pobo senón que se aproveitan del. Segundo engadiu, este movemento, que se esconde baixo siglas diversas e variopintas ou baixo líderes locais que participan deste furor, ten como común denominador que nunca aportan solucións e son froito da egolatría.
Así mesmo, Feijóo fixo fincapé que ese mal chamado populismo nunca pode ser rendible xa que grandes logros como o hospital público de Vigo, a depuradora, o transporte metropolitano, a ampliación de Rande, a loita a prol do sector naval e as novas iniciativas de PSA non terían sido posibles sen cooperación ou consenso. Pola súa banda, Muñoz encarna, baixo o punto de vista de Feijóo, a política de ideas maduradas en equipo. Ademais, está habituada a practicar un tipo de política que non se esgota nos números, pero que sen os números se reduce a mera palabrería. Para o líder do PPdeG, a súa traxectoria como conselleira de Facenda, subdirectora xeral de Control Financeiro e xefa de servizo de Control Financeiro, é unha garantía de que non fai promesas en balde.
Programa marco del PPdeG
O presidente do PPdeG, Alberto Núñez Feijóo, afirmou que o Programa-Marco do Partido Popular de Galicia para as eleccións municipais é a guía das reclamacións da xente e apuntou que ante os únicos que temos que responder é ante os galegos. Neste sentido, manifestou que este programa eleva o listón das nosas expectativas económicas, da xeración de novas oportunidades, das esixencias éticas aos representantes públicos e da participación e comunicación cos veciños, porque teñen que ter fío directo cos seus representantes municipais 24 horas e 365 días ao ano.
Feijóo iniciou a súa intervención lembrando que desde o día de onte os veciños de Vigo e a súa área metropolitana teñen un novo hospital público, porque rematouse a construción e a empresa construtora entregou a obra a quen sempre dixemos que sería e sería o seu propietario: a administración pública, é dicir, os cidadáns. E desde xa, ponse en marcha o proceso de traslado para que se poida prestar un mellor servizo público aos vigueses, polo que só hai un partido que acadou trasladar esta promesa do seu programa electoral á realidade: o Partido Popular, apuntou.
Ademais desta importante obra en Vigo, o presidente do PpdeG recordou outras actuacións levadas a cabo pola Xunta de Galicia nas grandes cidades galegas nos últimos catro anos, como a Terceira rolda ou o túnel do Parrote en A Coruña; o novo edificio xudicial ou a ampliación do hospital público en Ourense; a restauración da Catedral ou a estrada Brión-Noia na comarca de Santiago; a construción do auditorio ou a restauración da muralla en Lugo, a autovía de Sarria e o equipamento do novo hospital público; a nova Ponte de Correntes, a variante de Marín, ou o proxecto do novo edificio xudicial en Pontevedra; o novo auditorio, o saneamento da ría, o impulso ao Porto Exterior e o proxecto para Abrir Ferrol ao mar en Ferrol.
Mentres outros quedaron nas palabras, outros dixemos que faríamos o que fixemos; mentres outros quedaron na mentira, outros dixemos sempre a verdade da situación económica na que estábamos e estamos; e mentres outros quedaron na comodidade da simple crítica, outros puxemos todo da nosa parte para sobrepasar as dificultades, indicou.
O presidente do PPdeG recordou que tivemos que partir desde moi abaixo: desde o subsolo da xestión económica e da nosa imaxe e credibilidade como país, pero salientou que fixémolo e agora podemos comprometernos a elevar o listón, porque permíteo a realidade no ámbito económico, a recuperación da confianza e os cidadáns nolo están a pedir.
Este programa eleva o listón das nosas expectativas económicas, para seguir reducindo o paro e logrando o crecemento da economía; eleva o listón da xeración de novas oportunidades, que queremos garantir en cada concello e pensando especialmente nos máis novos; eleva o listón da necesidade dunha maior cooperación, tanto mediante as fusións de feito como a través das fusións de dereito que os concellos acorden voluntariamente; eleva o listón das esixencias éticas aos representantes públicos; eleva o listón da participación e comunicación cos veciños; e, en definitiva, eleva o listón do que se fixo nos concellos nestes catro anos, sinalou.
Feijóo apuntou que se trata dun Programa-Marco para comprometernos co traballo e o esforzo, para facer, para crecer, centrado en todo o que importa aos cidadáns e para gobernar para todos. Non é simplemente un trámite antes das eleccións, senón unha guía de goberno, unha obriga para autoesixirnos máis e unha guía de reclamacións para a xente, porque os cidadáns nos piden máis que aos demais porque poden esperar máis de nós, porque saben que podemos facelo mellor e porque ven que están a mellorar as expectativas, salientou.
Na súa intervención, o presidente do PPdeG anunciou o compromiso para que os concellos non sexan un freo senón un impulso para a recuperación económica, contribúan a que os servizos sociais cheguen con maior efectividade e calidade a máis veciños, sexan un espazo de oportunidades para que mozos e mozas poidan desenvolver a súa vida, dispoñan de máis facilidades para formar unha familia, faciliten a apertura dun negocio, sexan máis transparentes e máis abertos á participación dos veciños. En definitiva, concellos para ser vividos e non sufridos, con comunicacións, transportes, impostos e gobernos axeitados.
Feijóo tamén concretou que o noso apoio buscarémolo na rúa e non nas sedes doutros partidos, porque o noso equipo de goberno está nas nosas listas e porque a alcaldesa ou alcalde que apoiarán os nosos concelleiros é a persoa que encabeza a nosa lista. Nós non respondemos polo que fagan os outros partidos; responderemos polo que faremos nós, porque ante os únicos que temos que responder é ante a xente, ante os galegos, engadiu.
O líder do PPdeG asegurou que ninguén discute que o PP gañará as eleccións, nin tampouco que o PSOE despois destas eleccións terá a metade das súas forzas, ou que o BNG non se sabe se se converterá en círculos ou mareas ou seguirá mareado. Nesta liña, fixo fincapé en que os populares non somos só un partido político, somos o partido que interpreta o que o pobo nos pide nas urnas. Somos o partido do pobo, aseverou.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
