sábado, 7 de noviembre de 2026
Nota de prensa remitida por el Gabinete de Comunicación del BNG:
BNG-Asembleas Abertas presentou a campaña electoral para as eleccións municipais baixo o lema Depende de Nós, co que quere transmitir á cidadanía que ten nas súas mans darlle a volta a actual situación, desaloxar ao PP dos gobernos municipais e dar paso a un novo modelo de concellos ao servizo das persoas.
O director de campaña, Bieito Lobeira, fixo fincapé na idea do lema: Queremos transmitir que o modelo de concellos que queremos ter depende de nós, do que votemos os galegos e galegas o 24 de maio. E sintetizou o compromiso co pobo galego que BNG-Asembleas Abertas comunica a través desta campaña.
Ofrecemos un modelo de concellos con paredes de vidro, libres de corrupción e de corruptos, concellos ao servizo das persoas, non de poderes de ningún tipo, concellos nos que se poda vivir e traballar con dignidade, concellos con servizos sociais públicos de calidade, e concellos galegos, orgullosos da súa identidade e de formar parte deste país, explicou Lobeira, partindo da base de que BNG-AA é a alternativa nacionalista solvente implantada en todo o territorio.
Con este compromiso, o Bloque aspira a liderar o cambio ao PP nos concellos do país, con toda claridade, porque temos un aval que non teñen outras forzas políticas ou alternativas: o de saber facelo, argumentou Lobeira en relación aos concellos nos que goberna, que son unha referencia. A xente fala dos concellos do rural apelando ao modelo de Allariz, e fala dun concello urbano e apela ao modelo de Pontevedra. Estes modelos non existen en calquera outra forza política, subliñou.
A campaña desenvólvese en tres fases. A primeira establece un diálogo franco e aberto para, con preguntas directas á cidadanía, convidar a reflexión sobre os temas que máis preocupan a sociedade: servizos públicos, emprego, cobertura social, xestión honesta dos recursos públicos, urbanismo responsable, medio ambiente.
A saúde como negocio ou como dereito?, concellos para os amigos ou dos veciños e veciñas? grandes superficies ou comercio de proximidade?, recortes ou vida digna?, desprezar a lingua o querermos galego?, mocidade que emigra ou futuro en Galiza? Son algunhas das preguntas que a campaña formula e que remiten como resposta ao lema Depende de Nós. Tamén nas redes co hastag #dependedenós e na web http://dependedenos.gal/.
A segunda fase da campaña presenta a proposta marco para os concellos do país estruturada en cinco principios: Concellos abertos, para vivir, sociais, públicos e galegos.
Concellos transparentes, limpos e responsables cos recursos públicos. Concellos para mellorar a calidade de vida das persoas; concellos sociais ao servizo da xente con servizos municipais propios de calidade, concellos cun urbanismo responsable que practiquen o respecto polo medio ambiente, concellos galegos que defendan a cultura e o idioma do país, explicou a secretaria de Imaxe, Monste Prado.
A terceira fase da campaña está centrada na difusión das candidaturas, tanto da persoa que encabeza a lista como candidato ou candidata á alcaldía, como da equipa de homes e mulleres que conforman o conxunto da candidatura.
BNG-Asembleas Abertas, como xa fixo nas eleccións europeas, non pedirá nin un só euro aos bancos, nin fará mailing masivo, non imos depender da banca, nin de ningunha caixa central radicada en Madrid, ratificou Lobeira, nunha campaña boca a boca e porta a porta.
O financiamento corre a cargo exclusivamente de recursos propios, tanto da militancia con cotas extraordinarias como das achegas dos simpatizantes e, neste sentido, pon en marcha un sistema de doazóns, -crowfunding-, a través da web dependedenos.gal no que calquera persoa pode deixar a súa achega. Outra novidade é a posta en marcha dunha rede de activistas formada por voluntarios e voluntarias de apoio ás candidaturas.
Igualmente, na simbólica data do 25 de abril, organiza un acto nacional aberto en Pontevedra con candidatos e candidatas, que servirá para visualizar a implantación do Bloque en todo o territorio. Porque non somos unha marca electoral, nin un produto televisivo de último minuto, temos unha traxectoria de décadas de traballo en defensa do país, concluíu Lobeira.
Fotografía: Gabinete de Comunicación del BNG
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
