domingo, 1 de noviembre de 2026
O director xeral de Relacións Exteriores e coa Unión Europea, Jesús Gamallo, participou en EuroPCom, a Conferencia Europea de Comunicación Pública, organizada polo Comité Europeo das Rexións. Baixo o lema Máis alá das palabras. Unha historia de confianza, comunicadores, expertos e axentes de cambio exploraron o tema da comunicación pública dende a perspectiva da confianza nas comunidades, na tecnoloxía e nas institucións.
O director xeral asistiu a un obradoiro sobre comunicación pública na era da intelixencia artificial, no que puido constatar que Galicia é punteira neste ámbito coa primeira lei europea que regula e impulsa esta tecnoloxía no ámbito rexional. Tamén acudiu a un seminario sobre enfoques innovadores para revitalizar a confianza nas institucións públicas, destacando o caso da Xunta por estar presente nas principais redes sociais e empregar diferentes formatos e canles de comunicación.
EuroPCom
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
