martes, 27 de octubre de 2026
Nota de prensa remitida por el Gabinete de Comunicación de la Xunta de Galicia:
O teatro portugués regresa á carteleira do Salón Teatro de Santiago, que este xoves recibe a Companhia de Teatro de Almada co espectáculo O Mandarim, a partir da obra de Eça de Queiroz. Con esta función, programada para as 20.30 horas, arranca a nova carteleira na sede do Centro Dramático Galego (CDG) que, tras a temporada de exhibición da produción propia Xardín suspenso, acollerá ata xuño máis de 50 citas escénicas, musicais e audiovisuais.
Esta compañía portuguesa, con máis de 35 anos de traxectoria e promotora do histórico Festival de Teatro de Almada, visita Santiago no marco do programa de colaboración e intercambio que o CDG mantén esta temporada con diferentes estruturas teatrais do país veciño, entre as que se atopan tamén o Teatro Nacional D. María II de Lisboa, a Companhia de Teatro de Braga, Teatro Bruto do Porto e a plataforma artística PELE.
Teresa Gafeira é a directora desta montaxe, que a Companhia de Teatro de Almada estreou a finais do pasado ano esgotando as localidades nas 15 funcións ofrecidas na súa sede, o Teatro Municipal Joaquim Benite. Ademais, Gafeira asinou xunto a Pedro Proença a dramaturxia para adaptar ás táboas esta novela curta de Eça de Queiroz, figura indispensable da narrativa portuguesa do século XIX e máximo representante da novela realista e naturalista na súa lingua.
André Alves, Catarina Campos Costa, Celestino Silva, João Farraia, Maria Frade e Pedro Walter danlle vida aos personaxes desta historia protagonizada por Teodoro, un gris funcionario con grandes ambicións burguesas que, despois de asasinar un mandarín para herdar a súa fortuna, se sume nunha abafante crise de conciencia.
As entradas para a función de O Mandarim no Salón Teatro están xa á venda no web entradas.abanca.com e no despacho de billetes do Teatro Principal, aberto de 18.00 a 21.00 horas. No Salón Teatro, poderán adquirirse o mesmo xoves desde as 18.30 h.
O espectáculo forma parte, así mesmo, da oferta do Bono de Teatro Galego (e Portugués), promovido conxuntamente polo Concello de Santiago de Compostela e a Axencia Galega das Industrias Culturais (Agadic). O prezo deste bono, que pode mercarse nos devanditos despachos de billetes, é de 35 euros para un total de 5 funcións a elixir entre todas as desenvolvidas en 2015 no marco desta carteleira específica.
A programación do Salón Teatro continuará na fin de semana, durante a que lles propón aos espectadores cadansúa cita co teatro e co audiovisual de produción galega. En primeiro lugar, o venres 10 e o sábado 11 a nova compañía Vía Seis representará o seu espectáculo de debut, Amor en 3D, escrito e dirixido por José Prieto e protagonizado por Susana Álvarez, Celia González e Daniela Rodas. Ambas as funcións terán lugar ás 20.30 horas.
De seguido, a sede do CDG será o escenario da estrea de Memento Mori, curtametraxe dirixida por Marisa Otero e con Alejandro Carro, Camila Bossa, Mela Casal, Anabell Gago, Chicho Carballido, Pepes Castro e Fina Guitián nas interpretacións. O pase terá lugar o domingo 12, ás 18.30 horas.
Fotografía: Gabinete de Comunicación de la Xunta de Galicia
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
