miércoles, 12 de agosto de 2026
Nota de prensa remitida por el Gabinete de Comunicación de la Xunta de Galicia:
A Agadic (Axencia Galega das Industrias Culturais) resolveu a convocatoria pública de subvencións 2015 para festivais do sector audiovisual galego coa adxudicación, en distintas contías, da dotación total de 90.000 euros entre seis eventos galegos dedicados á difusión dos diversos xéneros cinematográficos.
Deste xeito, percibirán financiamento a través destas axudas a pasada edición 2014 do Festival Cineuropa de Santiago de Compostela (17.463,30 euros), e as próximas citas do Festival Internacional de Documentais Play-Doc de Tui (23.820,90 euros), o Festival de Cans de Curtametraxes (22.196,08 euros), a (S8) Mostra de Cinema Periférico da Coruña (18.542,14 euros), as Xornadas de Cine e Vídeo en Galicia (Xociviga) do Carballiño (3.052,40 euros) e o encontro especializado en cine fantástico Freakmacine (FKM) da Coruña (4.925,18 euros).
Este é o segundo ano no que a Axencia da Consellería de Cultura, Educación e Ordenación Universitaria convoca este programa específico de subvencións para dar resposta ás suxestións recibidas desde o propio sector audiovisual, no sentido de regular a través dunha convocatoria pública o seu apoio económico a certames, semanas e mostras audiovisuais. O seu obxectivo é optimizar, sistematizar e garantir a transparencia na adxudicación dos recursos públicos a este tipo de eventos, de xeito que o orzamento dispoñible para este fin sexa distribuído de acordo cunha serie de criterios obxectivos, así como da valoración da traxectoria, programación, viabilidade e interese dos proxectos presentados.
Entre os requisitos esixidos están o de desenvolverse en Galicia entre o 1 de novembro de 2014 e o 31 de outubro de 2015, ou o de ter realizado un mínimo de tres edicións consecutivas inmediatamente anteriores á publicación da convocatoria. Tamén se especifica que non pode darse o caso de máis dunha adxudicación a un mesmo beneficiario, tanto se se trata de propostas que partan das administracións como de colectivos ou persoas privadas.
A comisión de valoración analizou, ademais, a traxectoria dos festivais tomando en consideración datos relativos á súa programación, antigüidade, asistencia de público, repercusión nos medios de comunicación social, interese estratéxico para o sector e impacto económico e cultural no territorio onde se celebra, entre outros aspectos.
Na avaliación dos proxectos tamén se tivo en conta a programación e duración das últimas edicións de cada evento, a súa promoción do traballo dos realizadores galegos e o impulso á nova creación, as accións dirixidas ao fortalecemento do sector en Galicia, o seu carácter competitivo, os programas de cooperación, a contribución á formación de públicos, a presenza de autores, o plan de comunicación ou a edición do catálogo do evento.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
