martes, 27 de octubre de 2026
Nota de prensa remitida por el Gabinete de Comunicación de la Xunta de Galicia:
A Axencia Galega das Industrias Culturais (Agadic) e a Federación de Cineclubes de Galicia (Feciga) subscribiron un convenio de colaboración para o desenvolvemento en 2015 dun programa de ciclos e semanas de cine nunha ducia de localidades das catro provincias. O obxectivo é contribuír ao mantemento dunha programación estable e de calidade nos cineclubes galegos, impulsando deste xeito o seu labor de difusión e de creación de públicos para o cinema, con especial énfase na produción galega.
O director da Agadic, Jacobo Sutil, e o presidente da Feciga, Manuel Precedo, asinaron hoxe este acordo, mediante o que a Axencia da Consellería de Cultura, Educación e Ordenación Universitaria contribúe con 24.000 euros ao financiamento desta iniciativa, que se presenta como alternativa á exhibición cinematográfica dos circuítos comerciais. Trátase, dunha banda, de lle facilitar ao maior número posible de espectadores a posibilidade de ver cinema en pantalla grande e, doutra, de lles achegar propostas de calidade, de produción independente e de claro contido cultural.
Con esta dobre finalidade, a programación da Federación de Cineclubes de Galicia para 2015 articúlase arredor de ciclos e de semanas de cine. Organizados pola Feciga arredor dunha temática ou estilo determinados, a carteleira de cada un dos ciclos é seleccionada polos centros participantes a partir do catálogo proposto, mentres que no caso das semanas de cine, a organización corre a cargo dos propios cineclubes que, xunto coas proxeccións dos filmes, desenvolven diferentes actividades paralelas como debates, obradoiros e exposicións.
A Feciga, que agrupa a práctica totalidade dos cineclubes existentes en Galicia, botou a andar en 1984 e, desde entón, vén funcionando como xestora destas asociacións, ao tempo que presta servizos de asesoramento e organiza proxectos de difusión cinematográfica con diferentes entidades públicas e privadas. Este labor de promoción é especialmente destacado no caso do cinema galego, que se exhibe tamén en Portugal en colaboración coa Federación Portuguesa de Cineclubes.
Fotografía: Gabinete de Comunicación de la Xunta de Galicia
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
