martes, 27 de octubre de 2026
O conselleiro de Cultura, Educación e Ordenación Universitaria, Román Rodríguez, reclamou o uso da lingua galega en todos os ámbitos durante o acto central do 178 aniversario do nacemento de Rosalía de Castro. Unha conmemoración celebrada cunha ofrenda floral diante do busto da poetisa no Paseo da Alameda compostelá. Ademais durante a celebración desta efeméride os alumnos do instituto santiagués que leva o nome da escritora leron os seus poemas e se interpretou o Himno de Galicia. Deste xeito a Consellería apoia esta homenaxe á ilustre autora neste día, declarado oficialmente como Día de Rosalía de Castro.
Durante a súa intervención nesta xornada o titular de Cultura e Educación subliñou que a obra rosaliana supuxo o nacemento dun novo tempo para a lingua e a literatura de Galicia, xa que serviu para dignificar un idioma que ata daquela raramente excedera as temáticas humorística e costumista. Hoxe -engadiu- somos herdeiros do esforzo de moitas xeracións por poñer o noso idioma no lugar que merece e somos continuadores desa cadea.
Noutro momento do seu discurso Román Rodríguez afirmou que o compromiso coa lingua pasa polo seu uso cotiá e para esta tarefa contamos coa poboación mellor formada de toda a historia, xa que nunca antes tanta xente recibira formación de e en galego. Para rematar, Rodríguez González gabou a iniciativa dos nosos escritores actuais que animan a toda a sociedade galega a celebrar este día, para o que o departamento que dirixe insta á sociedade á promoción da lingua e da cultura galegas xa que todos somos partícipes da súa importancia
No acto tamén estiveron presentes os alcaldes de Santiago e Padrón, Agustín Hernández e Antonio Fernández, respectivamente, ademais do secretario xeral de Política Lingüística, Valentín García e o presidente da Fundación Rosalía de Castro, Anxo Angueira.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
