miércoles, 12 de agosto de 2026
Nota de prensa remitida por el Gabinete de Comunicación de la Xunta de Galicia:
O vicepresidente da Xunta, Alfonso Rueda, avanzou a aprobación no Consello da lei que reforma o financiamento dos partidos políticos galegos, que prohibe as doazóns e regula as fundacións vinculadas. Como lembrou, hai case dous anos que desde o Goberno galego se vén defendendo a necesidade aprobar unha norma deste calibre. De feito, Rueda indicou que o propio presidente comprometeu a súa aprobación no último Debate de Política Xeral no Parlamento galego.
Con respecto a isto, o vicepresidente lembrou que a redacción deste proxecto foi encargada ao Consello Consultivo de Galicia por encargo do Consello da Xunta e agora será remitido ao Parlamento para a súa tramitación.
Como indicou Rueda, trátase dunha lei que regula o financiamento público das formacións políticas, tanto no que se refire a subvencións para gastos electorais como para gastos de funcionamento ordinario, coa novidade de que en ambos casos non abonda con obter representación parlamentaria para acceder ás axudas, senón que é preciso tamén non ter recibido doazóns de persoas xurídicas nin anónimas.
Outra das novidades máis relevantes da nova regulación é que se estende ás fundacións e asociacións vinculadas ás formacións políticas, garantindo a regularidade das doazóns que poidan percibir por parte de persoas xurídicas.
O vicepresidente tamén destacou o novo papel que se lle atribúe ao Consello de Contas para o control e fiscalización da actividade económico-financeira das formacións políticas que dispoñan das subvencións. Así mesmo, apuntou que a lei é unha aposta pola maior publicidade e transparencia, cunha serie de obrigas de publicidade das subvencións outorgadas tanto a partidos como a fundacións ou asociacións vinculadas.
En definitiva, como salientou Rueda, iranse coñecendo os pormenores desta lei, que inmediatamente se trasladará ao Parlamento coa intención de acadar o máximo consenso posible.
Segundo concluíu, trátase dunha nova lei que busca delimitar con claridade o financiamento dos partidos políticos, que se estende ás fundacións e asociacións vinculadas a eles, que prohibe aceptar doazóns anónimas e de persoas xurídicas, que outorga ao Consello de Contas un papel reforzado de control e fiscalización e que aposta pola publicidade e a transparencia.
O vicepresidente da Xunta lembrou que esta lei enmárcase no seo do Programa de Impulso Democrático que o Goberno galego presentou hai unhas semanas, con propostas no eido da transparencia, da prevención da corrupción e da mellora da participación política. Trátase, en palabras de Rueda, dun auténtico programa de impulso democrático, que o presidente da Xunta se comprometeu a poñer a andar no prazo de 50 días.
Fotografía: Gabinete de Comunicación de la Xunta de Galicia
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
