miércoles, 22 de octubre de 2025
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria da Xunta de Galicia destinará novos recursos para conservar e poñer en valor o Conxunto Histórico-Artístico de Sargadelos. Con este obxectivo, asinará este ano un convenio de colaboración co Concello de Cervo que terá por obxecto contribuír ao funcionamento e conservación da Casa de Administración, así como a realización do proxecto expositivo do Museo Histórico de Sargadelos.
A aprobación deste convenio tivo lugar no marco da reunión ordinaria do Padroado do Conxunto Histórico-Artístico de Sargadelos, que se celebrou no municipio lucense de Cervo e que estivo presidida polo secretario xeral de Cultura, Anxo Lorenzo. Tamén participaron na reunión o alcalde de Cervo, Alfonso Villares; a xefa territorial de Cultura e Educación en Lugo, Carme Gueimunde; a xefa do servizo de Coordinación de Acción Cultural da Consellería, Yolanda Gómez; e a vicepresidenta segunda da Deputación Provincial de Lugo, Lara Méndez.
A Xunta de Galicia é a única administración que está a realizar investimentos no Conxunto Histórico-Artístico de Sargadelos, co apoio do Concello de Cervo, que acometerá actuacións para o acondicionamento exterior da Casa da Administración, a través de labores de limpeza e mellora dos accesos.
A Casa da Administración, convertida no Museo Histórico de Sargadelos, reúne todo tipo de pezas históricas da Real Fábrica de Louza e da actual Fábrica de Cerámica de Sargadelos. O museo tamén ofrece información sobre as distintas etapas históricas da Real Fábrica de Louza, sobre as materias primas e a elaboración das pastas para moldear as pezas, sobre a elaboración das formas e a súa tipoloxía ou sobre as coccións e a decoración das pezas.
O investimento de 30.000 euros que realizará este ano a Xunta de Galicia permitirán avanzar na conservación e posta en valor deste conxunto histórico-artístico, nacido da vontade de Isaac Díaz Pardo e de Luís Seonane de crear un lugar emblemático e pioneiro da creación artística e do rexurdir cultural de Galicia, preto do que foi o antigo complexo das fábricas de siderurxia e cerámica dos séculos XVIII e XIX de Sargadelos creado por Antonio Raimundo Ibáñez.
O 22 de xaneiro, a Consellería de Cultura e Educación publicou no Diario Oficial de Galicia a Declaración de Ben de Interese Cultural (BIC), coa categoría de monumento, a Fábrica de Cerámica de Sargadelos ligada ao Laboratorio de Formas, tal como establece o Decreto 171/2014, do 26 de decembro, aprobado polo Consello da Xunta.
Ademais de protexer e conservar este singular proxecto industrial, cultural e de identidade galega, a declaración como BIC contribúe, así mesmo, a poñer en valor e distinguir un conxunto industrial cunha gran significación arquitectónica, artística, científica, técnica e cultural único en Galicia, ao tempo que favorece a súa conservación a través da máxima protección legal.
A delimitación do complexo que establece a declaración como BIC inclúe o edificio circular de Andrés Fernandez-Albalat, a vivenda de Isaac Díaz Pardo, o Auditorio e Departamento de Arte e Comunicación, a Escola de Tecnoloxía e Laboratorios, a marquesiña ondulada de formigón do aparcamento, torres e pasarelas metálicas que comunican os edificios, o zócolo de pedra da ampliación da fábrica cos seus murais e esculturas de Díaz Castro, o depósito de auga-miradoiro, o edificio de tratamento de minerais, dous fornos experimentais e a Pía do Xunco co mosaico de Luís Seoane.
Ademais, a declaración BIC inclúe unha serie de pertenzas, accesorios e bens mobles e documentais vinculados especialmente ao conxunto que quedan tamén baixo protección, como os mosaicos de Luís Seoane no comedor do edificio circular, a escultura de tres caras de Díaz Pardo incrustada no muro da planta baixa da praza circular, a Táboa dos Irmandiños, os mobles deseñados por Díaz Pardo para o devandito edificio e o sistema de sinalización, obra de Isaac Díaz Pardo.
A Xunta reclamará de novo en Bruxelas unha Política Agraria Común ben dotada, con financiamento suficiente e con fondos específicos e diferenciados, como ata o de agora, que permitan apoiar a renda dos agricultores e gandeiros e garantir o impulso ao desenvolvemento rural e afianzar as medidas de remuda xeracional. Así o avanzou a conselleira do Medio Rural, María José Gómez, en resposta a unha pregunta parlamentaria sobre este asunto e na que reiterou o rexeitamento de Galicia á proposta da UE para a vindeira PAC a partir de 2028, polo centralismo desta nova política, cunha arquitectura baseada nun fondo único para os estados membros que resulta lesiva para a nosa comunidade.
A Xunta porá en marcha no 2026 unha Oficina de Atracción de Talento que coordinará todas as medidas en materia de emprego destinadas aos galegos e galegas do exterior que deciden retornar para traballar na súa terra, así como as iniciativas dirixidas a favorecer a contratación planificada de persoas traballadoras de 3º países por parte de empresas da nosa comunidade. Deste xeito, Galicia consolidará un modelo propio que aposta por captar persoas traballadoras de xeito ordenado e sempre en base a un emprego de calidade -por conta allea ou emprendendo-.
