domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
O conselleiro de Economía e Industria, Francisco Conde, subliñou, nun encontro mantido cos representantes dos clusters empresariais galegos dentro da rolda de contactos iniciada para consensuar a Axenda da Competitividade Industrial Galicia Industria 4.0, o importante papel que xogan estas asociacións na mellora competitiva do tecido industrial da Comunidade. Así, Conde destacou a súa excelencia e a cooperación intersectorial como chaves para impulsar a mencionada Axenda.
Durante a reunión, que permitiu escoitar e valorar as principais achegas dos clusters, o conselleiro salientou a importancia dun documento clave para o futuro de Galicia, que aspira a configurar unha industria competitiva, diferenciada e xeradora de emprego de calidade. Obxectivos nos que os clusters galegos están chamados a desempeñar un papel fundamental dado o seu coñecemento do entorno empresarial e a posibilidade de cooperación coa administración.
Neste sentido, os clusters configúranse como parte fundamental dunha Axenda que aposta polo equilibrio entre o reforzo dos sectores tradicionais e o impulso dos emerxentes, ademais de pola hibridación multisectorial, que supón a interconexión de sectores distintos na procura de aproveitar as sinerxías entre eles para mellorar a súa competitividade no mercado global. Así trasladouno o conselleiro aos clusters galegos que amosaron a súa conformidade cos contidos do documento e a súa vondade de colaboración ante unhas actuacións que están en liña co que o tecido empresarial necesita.
Neste escenario, a aposta da Consellería de Economía e Industria pasa por seguir apoiando a consolidación de clusters excelentes sobre a base dos dous que xa teñen sido recoñecidos co selo de excelencia Gold Label, o da automoción e o da madeira. Do mesmo xeito, un dos obxectivos do Igape é intensificar o labor de colaboración no seo dos propios clusters e entre diferentes clusters, a nivel internacional e no marco dunha rede cada vez máis ampla.
Para acadar estes obxectivos, a Consellería de Economía e Industria está a apoiar o labor dos clústers galegos destinando, nos últimos dous anos, máis de 5 millóns de euros para promover a súa excelencia e a internacionalización.
Co desenvolvemento da Axenda, explicou o conselleiro, a Xunta aspira a modernizar a industria galega a través da innovación, establecendo novas fórmulas de produción que melloren a súa competitividade, e impulsando a fabricación de produtos diferenciados e de calidade.
O obxectivo é consolidar en Galicia a denominada Industria 4.0, composta por fábricas intelixentes, automatizadas, flexibles, interconectadas, sostibles e sociais, que conta con espazos compartidos entre humanos e máquinas, e outorga máis responsabilidades ás persoas, máis cualificadas e ben formadas, capaces de xestionar eficientemente os novos ámbitos produtivos.
Neste contexto, o conselleiro lembrou que, de cara a promover a actividade industrial, a Axenda está a facilitar xa o acceso a solo industrial, con rebaixas no custo do metro cadrado de ata o 50% para os parques empresarias ubicados nas Zonas Impulsa e para os concellos fronteirizos con Portugal. Ademais, establécese unha rebaixa do 30% no resto de parques salvo os das áreas urbanas, que contarán cun desconto do 15% -Mos, Ponte Candelas, Santiago e Morás-.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
