miércoles, 19 de agosto de 2026
Nota de prensa remitida por el Gabinete de Comunicación de la Xunta de Galicia:
O presidente do Goberno galego, Alberto Núñez Feijóo, reafirmou a aposta da Xunta pola innovación, unha aposta de país, dixo, para unha Galicia ambiciosa que non se conforma e quere crecer.
Durante unha visita ao viveiro de empresas do Centro de Negocios do Parque Empresarial Porto do Molle, onde clausurou a Demo Day da segunda edición de ViaVigo, Feijóo afirmou que a innovación seguirá a ser un dos tres grandes eixos da política económica do Executivo galego, xunto co pulo industrial, recollido na Axenda da Competitividade Galicia-Industria 4.0, e a busca de novos mercados, promovida a través da Estratexia de Internacionalización.
A innovación non é un gasto é un investimento, aseverou, e lembrou que este é o principio que puxo en marcha a Estratexia de especialización intelixente de Galicia (RIS3), coa que se recollen as prioridades da innovación galega de aquí a 2020 e que permitirá á Comunidade mobilizar 1.600 millóns de euros en investimentos innovadores.
Nesta liña, salientou que a Xunta apoiará con ata 75.000 euros a cada un dos proxectos seleccionados dentro da iniciativa ViaVigo, porque cremos que proxectos como estes hai que apoialos con financiamento a fondo perdido e tamén a través de créditos, explicou.
Conscientes de que as necesidades dos emprendedores non se reducen a unha cuestión financeira, o responsable do Goberno galego destacou a importancia de ofrecer tamén asesoramento acompañándoos coa Unidade Galicia Emprende que xa leva aconsellado a máis de 250 proxectos.
Así mesmo, referiuse ao compromiso da Xunta coa formación, a través de programas para estimular o espírito emprendedor e nos que levan participado máis de 5.000 alumnos.
O presidente do Goberno galego destacou o traballo da Zona Franca de Vigo para desenvolver iniciativas como ViaVigo, na que tamén participa a Xunta, e avanzou o obxectivo de estender esta iniciativa a Lugo e Ourense, para que tamén teñan o seu propio proxecto de aceleradora de empresas. Non en van, resaltou que no Concello de Vigo creáronse 736 novas empresas en 2014, un 13,6% máis que en 2013; e, no conxunto da comarca, o incremento foi de case un 11%.
O titular da Xunta concluíu a súa intervención destacando o talento dos participantes, un talento que, segundo aseverou, non se pode desaproveitar, e que hai que seguir formando para poñer ao servizo da sociedade.
Fotografía: Gabinete de Comunicación de la Xunta de Galicia
O sistema educativo galego contará con 536 centros plurilingües o próximo curso 2026/27 nas etapas de Infantil, Primaria, ESO ou Bacharelato e FP. Seis centros decidiron incorporarse a esta iniciativa e outros dous ampliar a súa participación na mesma a outras etapas, o que confirma o incremento progresivo deste modelo, voluntario para os centros, desde a súa posta en marcha. Do total dos centros con modelo plurilingüe, 445 serano en Primaria e 93 en ESO (se ben parte deles sono en ambas etapas á vez), 259 en Infantil, 16 centros en Bacharelato e 40 en FP. Ademais dos centros plurilingües, a Consellería oferta diversas modalidades. Así, outros centros optan por contar con seccións bilingües.
O Proxecto Xenoma Galicia, que procura detectar variantes de risco para enfermidades hereditarias graves como o cancro de mama e ovario, a síndrome de Lynch ou a hipercolesterolemia familiar, xa permitiu detectar 42 persoas positivas entre as 2.504 mostras que se levan analizado. Este programa pioneiro de cribado xenético acada 2.504 mostras analizadas ata o de agora dos 4.261 participantes reclutados ata o momento, rexistrando unha taxa de positividade do 1,7 %.
