domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
O presidente da Xunta, Alberto Núñez Feijóo, anunciou na rolda de prensa do Consello un investimento de 45,4 millóns en cinco programas de formación e emprego que beneficiará a 100.000 persoas. Damos o visto e prace a un importante paquete de medidas en materias de emprego e formación para o ano 2015, dixo, ao que engadiu que o Goberno galego redobrará os esforzos para que cada vez máis persoas poidan acceder a un emprego en Galicia.
Máis polo miúdo, Feijóo subliñou que o primeiro dos cinco programas vai destinado á formación de desempregados. Neste senso, apuntou que, segundo se ten detectado, máis do 60% dos parados de Galicia amosan graves deficiencias de formación, o que os dificulta, por riba doutras circunstancias, á consecución dun emprego. Polo tanto, o Goberno galego investirá para este fin 23,5 millóns de euros, e prevé realizar 700 accións formativas que beneficiarán a preto de 10.000 persoas.
A segunda liña de axudas irá destinada ao programa de emprego e formación para a mellora da empregabilidade en colaboración con entidades locais. Como sinalou o presidente da Xunta, levaranse a cabo 50 proxectos, cun orzamento de máis de 10 millóns de euros e centrados na realización de obras ou servizos de interese xeral e social, que procuren a cualificación profesional e beneficien preto de 1.100 persoas.
Así mesmo, o titular da Xunta precisou que sempre que sexa posible, un 20% dos participantes nestes programa serán beneficiarios da RISGA.
Os beneficiarios da Renda de Integración Social terán tamén un tratamento favorable nos programas integrados para o emprego. Segundo detallou Feijóo, esta liña contará cun orzamento de 5,7 millóns de euros e beneficiarán a 2.000 persoas a través de programas integrados de intermediación laboral.
En cuarto lugar, o presidente destacou o programa de fomento do emprego e mellora da empregabilidade no ámbito de colaboración coas entidades coas entidades locais, aos que a Xunta destinará un orzamento de 1,3 millóns de euros, beneficiando a 180 persoas.
Por último, o mandatario galego indicou que a Xunta impulsará tamén un programa de información laboral, orientación e prospección de emprego, que contará cun orzamento de 4,6 millóns de euros e beneficiará a 85.000 demandantes de emprego inscritos no Servizo Público de Emprego de Galicia.
Feijóo precisou que esta última orde xa foi publicada a pasada semana e está previsto que as outras catro saian tamén publicadas no Diario Oficial de Galicia antes de que remate a vindeira semana. Por tanto, nos 15 primeiros días de xaneiro teremos máis do 40% do total de fondos adicados a emprego a disposición de empresas e a disposición do mercado laboral, insistiu, logo de aseverar que non serán as últimas medidas, xa que a Xunta traballa en dous programas específicos dirixidos a menores de 25 anos e a parados de longa duración, que serán aprobados este mes de xaneiro e que teñen como obxectivo favorecer a inserción laboral destes colectivos.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
