domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
O conselleiro de Economía e Industria, Francisco Conde, iniciou coa Confederación de Empresarios de Galicia e as confederacións provinciais o diálogo cos axentes económicos da comunidade para consensuar a Estratexia de Internacionalización da Empresa Galega 2020, unha rolda de contactos que durante as próximas semanas permitirá achegar ao texto final as aportacións do tecido industrial e comercial de toda a comunidade.
Na reunión participaron, ademais do conselleiro, o presidente da CEG, José Manuel Fernández Alvariño; o presidente da Confederación de Empresarios de Pontevedra, Luis Novoa; o vicepresidente primeiro da Confederación de Empresarios da Coruña, Antón Arias Díaz-Eimil; e o conselleiro delegado executivo da Confederación de Empresarios de Lugo, Jesús Quinta.
Durante o encontro, Conde trasladou aos empresarios que o seu apoio é fundamental para acadar os obxectivos da Estratexia: incrementar as exportacións galegas nun 25% en 2020 ata superar os 23.000 millóns de euros, coa meta global de acadar o 40% do PIB galego en 2020.
Conde salientou ademais o papel fundamental que deben xogar os empresarios para consolidar o traballo realizado pola Xunta neste documento, e reflectir nel todas as inquedanzas do tecido empresarial da comunidade. En concreto, o conselleiro resaltou dous eixos incluídos dentro da Estratexia para os que reclamou unha especial implicación da CEG e das confederacións provinciais: o primeiro é a elaboración de dez plans sectoriais para os dez sectores estratéxicos da comunidade, que adecuarán as estratexias máis axeitadas para impulsar as exportacións ás particularidades, desafíos e fortalezas de cada ámbito empresarial.
O segundo trata do reforzamento da unidade da acción entre Xunta e empresarios, clave nos éxitos acadados ata agora no impulso á internacionalización galega. Neste senso, durante o encontro defendeu a importancia da cooperación dos axentes implicados e as entidades financeiras, e resaltou que a Estratexia recolle ademais o intercambio de coñecemento e boas prácticas entre axentes, a alineación co Horizonte 2020 para aproveitar os fondos europeos e o desenvolvemento dunha plataforma de internacionalización con todos os axentes.
Neste mesmo ámbito, Conde trasladou aos representantes empresariais a vontade de impulsar dous instrumentos conxuntos da Xunta e a CEG que teñen impulsado os negocios galegos no exterior, como a Rede Pexga e a rede de licitacións internacionais SALT.
Estas medidas, sinalou Conde, están incluídas dentro do plan de acción global que supón a Estratexia de Internacionalización 2020, que se apoiará en cinco piares: o fomento da cultura de internacionalización, o incremento da presenza en mercados internacionais, a atracción de investimentos, a consolidación da marca Galicia Calidade, e a unidade de acción de axentes, pemes e entidades financeiras.
Fotografía: Gabinete de Comunicación de la Xunta de Galicia
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
