miércoles, 28 de octubre de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria participou en Vigo na presentación das novidades preparadas polo Festival Sinsal Son Estrella Galicia para a súa cuarta edición na Illa de San Simón (Redondela), que terá lugar neste enclave natural da ría de Vigo do 25 ao 27 de xullo. Este ano amplíanse de dous a tres os días de celebración, durante os que se ofrecerá un total de 26 concertos de bandas e artistas internacionais que, na meirande parte dos casos, actúan por vez primeira en Galicia.
Outra das novidades de 2014 refírese á distribución dos concertos. O cartel do sábado, xornada para a que xa están esgotadas as entradas, repetirase tamén o domingo e non se desvelará ata que o primeiro barco do día 26 atraque na illa, seguindo así a fórmula empregada en anos anteriores. Porén, a organización si deu a coñecer os nomes dos cinco grupos que tocarán o venres: Throwing Shade, Frikstailers, Jagwa Music, Oso Leone e Xenia Rubinos.
Na presentación desta nova edición e en nome da Consellería de Cultura e Educación, o director da Agadic (Axencia Galega das Industrias Culturais), Jacobo Sutil, compartiu mesa con Javier Bas, alcalde de Redondela; Laura Piñeiro, product manager de Estrella Galicia; e Julio Gómez, codirector do Sinsal. Todos coincidiron en destacar a consolidación do festival como un dos eventos máis singulares no ámbito dos festivais europeos de verán.
Na súa intervención, Sutil felicitou aos organizadores por apostar con éxito por unha fórmula rompedora a todos os niveis: Desde a proposta artística ata a súa sede na Illa de San Simón, pasando pola extraordinaria relación de fidelidade e confianza mutua co público, cada vez máis numeroso, que congrega este festival mesmo sen desvelar o seu cartel completo ata o último momento, sinalou. Ao tempo, incidiu en que o feito de que este festival manteña unha liña de crecemento progresivo desde a súa creación vén confirmar que a diferenciación e a profesionalidade son claves para o éxito de calquera iniciativa cultural.
O director da Agadic manifestou que para a Consellería de Cultura e Educación resulta igualmente sobresaínte a contribución de Sinsal á difusión dos valores históricos e patrimoniais de San Simón. Neste sentido, ademais dos concertos nos tres escenarios principais, o festival propón un programa paralelo a través do que convida a descubrir a historia deste espazo declarado Ben de Interese Cultural: desde as Músicas Escondidas que o público debe atopar no seu percorrido polas dúas illas, ata as actividades infantís.
Jacobo Sutil insistiu tamén en que a repercusión dos festivais de música vai máis alá da súa faceta lúdica como alternativa dentro da oferta cultural e de ocio: Estamos a falar dixo dun tipo de eventos que son estratéxicos para a industria musical galega, ademais de funcionar en moitos dos casos como motores para a dinamización turística e económica dos lugares que os acollen.
Lembrou a este respecto que a Consellería de Cultura e Educación mantén desde 2012 unha liña específica de subvencións, que convoca a través da Agadic como canle estable de apoio público aos festivais musicais e escénicos que se celebran cada ano en Galicia e da que o Festival Sinsal resultou adxudicatario nas súas dúas edicións anteriores. Nestes momentos, a convocatoria de 2014 atópase en proceso de trámite cara á súa resolución, momento no que se darán a coñecer os proxectos que recibirán apoio económico este ano a través desta vía.
As entradas para asistir ao Festival Sinsal Son Estrella Galicia inclúen tamén o traslado en barco á Illa de San Simón con diferentes horarios e combinacións de ida e volta. Poden adquirirse en liña a través da web http://entradas.abanca.com/.
Más información en: http://festival.sinsalaudio.es/
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
