viernes, 24 de abril de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria ofrece o domingo 4 de maio no Salón Teatro de Santiago a première en España da longametraxe de produción galego-cubana con guión e dirección de Maikel G. Ortiz Lejos de La Habana.
O filme, inspirado en acontecementos reais, narra as vivencias de tres cubanos residentes en Galicia, onde levan unha vida moi diferente á do seu país natal. A emigración e a súa influencia nos personaxes é o tema de fondo, tratado de xeito que dá como resultado unha emotiva historia de soidade, desamor e nostalxia.
As interpretacións de Yansamill Núñez, Ricardo Becerra e Maikel G. Ortiz nos roles protagonistas súmanse ás de outros once actores e actrices cubanos e galegos, nun elenco no que participan tamén unha colombiana e un angolano.
A película fuxe de estereotipos e céntrase no individuo, no seu nivel de integración e na súa capacidade de asimilar o distanciamento das raíces afectivas e culturais a través da situación vital dos tres personaxes principais. Así, regresar ao seu país é a intención de Yolanda, cubana residente en Compostela, pero volver á illa resúltalle máis difícil que saír dela. Tamén Pablo desexa viaxar coa súa filla para que esta coñeza os seus avós cubanos. William, pola súa banda, atópase moi a gusto na capital de Galicia, pero ameazado por non asumir as súas débedas, debe decidir se volver a Cuba ou non.
Lejos de La Habana, producida por LaCocinaFilmS e financiada en parte grazas a unha campaña de micromecenado, foi premiada como Mellor Produción na 13ª Muestra Joven de ICAIC (Instituto Cubano de Arte e Industria Cinematográficas).
O festival Play-Doc desenvolverá do 29 de abril ao 3 de maio en Tui a súa 22ª edición para conectar memoria, creación actual e futuro do cinema galego e internacional. No ámbito galego, a programación desta edición volve ocupar un lugar central cunha Competición Galicia que reúne títulos de Xiana do Teixeiro, Roi Fernández, Xacio Baño, Adrián Canoura, Cristina Souto, Hugo Amoedo, Bea Lema, Berio Molina e Chloé Lecci López, entre outras voces. O festival mantén, ademais, a sección Sombras, dedicada nesta ocasión á recuperación da figura de Rafael Luca de Tena, e unha nova edición de Coming Soon, espazo no que se presentarán proxectos galegos en desenvolvemento. O Play-Doc continúa a reforzar a súa función de escaparate e plataforma de difusión para a produción audiovisual do país e como punto de encontro para novas obras e profesionais.
O número de persoas en Galicia que le ocasional ou habitualmente na nosa lingua medra en case nove puntos ata acadar o 72 %, isto é, sete de cada dez galegos. Ademais deste incremento do 13 por cento na lectura ocasional ou habitualmente en galego con respecto ao ano anterior, o estudo de 2025 tamén revela a consolidación dunha Galicia lectora, reflectida no sindicadores que sinalan que o 96,5 % da poboación maior de 14 anos le en calquera medio e soporte, o que sitúa a nosa Comunidade nun 1,4% por enriba da media de España. Ademais, o 70 % destas lecturas son de libros.
