miércoles, 8 de abril de 2026
Nota de prensa remitida por el Gabinete de Comunicación de la Xunta de Galicia:
O xerente da S.A. de Xestión do Plan Xacobeo, da Secretaría Xeral para o Turismo asistiu a apertura da mostra As compostelas en Compostela que conta coa colaboración da sociedade e que se pode visitar na sala de exposicións da Hospedaría de San Martiño Pinario, en Santiago.
Esta exposición, cuxo autor é o escritor Fernando Lalanda e que está comisariada por Mario Clavell, está organizada pola Asociación Galega de Amigos do Camiño de Santiago e mais pola Asociación de Amigos do Camiño de Santiago de Madrid. A mostra recolle a historia e evolución da compostela, o certificado das peregrinacións a Santiago, xunto con outros documentos xacobeos do período de 1733 a 1993.
Fernando Lalanda, escritor e peregrino dende 1976, é autor de diversos libros de temática xacobea, tales como El juego de la oca en el Camino de Santiago, El boom del Camino en sus años oscuros, 1961-1969, ¿Sois peregrinos?, 1976 un Camino en la Transición ou Madrid a los pies de Santiago.
Co nome de compostela coñécese o diploma que a Catedral de Santiago entrega aos peregrinos que chegan a Santiago con sentido cristián e acreditan esa condición e tras percorrer un mínimo de cen quilómetros a pe, a cabalo ou douscentos en bicicleta. Este documento é a evolución dos antigos certificados chamados de Confesión e Comunión e a súa crecente popularidade vai parella ao auxe dos Camiños.
A exposición exhibe a historia e transformación do certificado dende 1733 a 1993, ata chegar aos catro modelos que actualmente expide a Catedral compostelá. A mostra complétase con documentos que outras institucións outorgan ao peregrino, tales como os diversos diplomas de final de peregrinación que a imitación da compostela emiten outros centros de peregrinación cristiá, ou os diplomas que a modo de recordo recollen os peregrinos ao seu paso polos lugares por onde pasa o Camiño de Santiago. Todos estes documentos expostos amósanse detalladamente nun catálogo. Así mesmo, os visitantes poderán solicitar un documento nominal que acredite a súa visita á exposición realizado expresamente por Mariano de Souza, chamado o pintor do Camiño.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
