Noticias

Galicia sitúase como a comunidade autónoma coa menor taxa de pobreza infantil de España

A conselleira de Política Social e Igualdade, Fabiola García, compareceu esta tarde no Congreso dos Deputados ante a subcomisión sobre o estudo dun pacto de Estado para a erradicación da pobreza infantil. Na súa intervención, puxo en valor a situación de Galicia, que se consolida como unha das comunidades con menores índices de desigualdade, e apostou por esixir o compromiso firme de todas as administracións para garantir “unha infancia digna, equitativa e con oportunidades reais”.

Fabiola García destacou que a comunidade galega “pode e debe ser parte activa na construción dun país máis xusto para a infancia” e lembrou que, segundo os datos do Instituto Nacional de Estatística, Galicia é a comunidade que máis reduciu en 2024 a taxa Arope, que mide o risco de pobreza e exclusión social. Actualmente, a taxa situase no 18,8%, a máis baixa da que se teñen datos e sete puntos por debaixo da media nacional.

No caso concreto da pobreza infantil, os datos da estatística da Plataforma da Infancia revelan que Galicia foi en 2024 a comunidade coa menor taxa de pobreza infantil de toda España. En doce meses, a comunidade galega reduciu esta taxa en 10 puntos, ata quedar no 16%, moi por debaixo da media estatal, que se sitúa no 34,1%. Ademais, a estatística tamén pon de manifesto que Galicia é única comunidade que ten alcanzado o obxectivo marcado polos Obxectivos de Desenvolvemento Sostible (ODS) relativos á pobreza infantil, cunha diferencia positiva de 4,2 puntos.

En relación a estes datos, a conselleira esixiu ao Goberno central “un compromiso real” que permita garantir a sostibilidade dos servizos sociais que dependen das comunidades e un financiamento “acorde coas necesidades reais que temos”.

Na súa intervención, a conselleira puxo en valor o papel que xoga Galicia na erradicación da pobreza infantil, un eido no que o Goberno galego puxo en marcha nos últimos anos medidas pioneiras que están dando resultados. Nesta liña, detallou un conxunto de políticas públicas que están orientadas á protección social, ao reforzo dos servizos comunitarios e que implican investimento en igualdade de oportunidades. Concretamente, medidas centradas na infancia, na educación e no apoio ás familias.

A gratuidade das escolas infantís

Fabiola García incidiu en que “investir en infancia é investir en futuro” e destacou a aposta de Galicia pola gratuidade das escolas infantís, unha medida pioneira en España e que supón un investimento de 65M€ ao ano de fondos propios. Actualmente, Galicia é a comunidade que ofrece a gratuidade con máis amplitude, ao estar implantada en máis de 550 escolas infantís, con máis de 32.000 prazas gratuítas, durante 8 horas ao día e 11 meses ao ano. Esta medida permite que Galicia conte cunha taxa de escolarización nesta etapa do 60,6%, trece puntos por riba da media estatal e sexa líder en escolarización por segundo ano consecutivo, superando os obxectivos que marcha a Unión Europea para 2030 e a niveis de países europeos como Suecia ou Dinamarca.

Entre outras medidas do Goberno galego, a conselleira destaca a rede de atención temperá coa que conta Galicia, totalmente gratuíta para as familias con nenos con problemas no desenvolvemento e que dá servizo a 200 municipios. Ademais, puxo en valor o investimento anual de máis de 130M€ en varías liñas de actuación de garantía infantil: como rede de Casas Niño no rural, cun centenar de unidades de atención, a Tarxeta Benvida, cunha dotación directa de 32M€, ou Bono Concilia Familia, con 15.000 beneficiarios o ano pasado.

Fabiola García tamén lembrou o reforzo impulsado no sistema de protección de menores, conseguindo que o modelo de Galicia destaque polo seu carácter integrador. Neste eido, tamén destacou o apoio da Xunta ao acollemento familiar, co incremento este mesmo mes de maio das axudas a familias acolledoras.

Por último, a conselleira detallou que todas estas medidas van acompañadas dun investimento doutros 131M€ destinados á inclusión social e co obxectivo para apoiar aos fogares máis vulnerables, en especial aos que teñen menores a cargo.