domingo, 20 de julio de 2025
O presidente da Xunta, Alfonso Rueda, puxo en valor esta mañá en Sanxenxo o papel de Galicia como referente nacional en calidade ambiental e turística, no acto de izado de bandeiras azuis que distinguen aos areais e portos deportivos máis destacados do país: Non se me ocorre mellor maneira de empezar a temporada de máis afluencia que volvendo izar a bandeira azul, salientou. Rueda subliñou que Sanxenxo mantén a súa posición á cabeza do conxunto estatal con 17 praias, 3 portos deportivos (o Real Club Náutico Sanxenxo, o Club Náutico Portonovo e o Porto Deportivo Juan Carlos I) e 1 centro azul (o Centro de Interpretación das Telleiras), ademais de ser o concello que conta co maior número de sendeiros azuis de toda España, cun total de 8 rutas.
O titular do Executivo galego sinalou que as bandeiras azuis avalan non só a beleza das praias galegas, senón tamén a súa limpeza, seguridade, accesibilidade, calidade das augas e o traballo en materia de educación ambiental: Esta é unha marca de excelencia, desa Galicia Calidade que ofrecemos a todo o mundo que quere vir a visitarnos, apuntou Rueda. E destacou que estes logros son froito da colaboración de concellos, profesionais do sector, entidades colaboradoras e veciñanza, que coidan cada día deste patrimonio común.
Galicia mantense entre as tres Comunidades con máis distintivos azuis (tras a Comunidade Valenciana e Andalucía) con 137 galardóns que inclúen praias, portos e centros azuis, ademais de 54 sendeiros azuis recoñecidos en marzo. De feito, concentra unha de cada seis bandeiras azuis concedidas este ano aos areais españois. Para Rueda, estes datos confirman a Galicia como un referente en calidade de ocio marítimo e demostran o respecto e o compromiso coa conservación do litoral.
Neste senso, o presidente fixo tamén referencia ao traspaso efectivo das funcións e servizos en materia de ordenación do litoral, en vigor desde o pasado 1 de xullo, que permitirá á Xunta ordenar, protexer e aproveitar de maneira sostible os máis de 2.500 quilómetros de costa galega: Podemos facer moitas cosas desde aquí para seguir mellorando a costa da comunidade autónoma con máis quilómetros de litoral, onde hai economía, onde hai vida, e onde temos que preservala en sitios tan bonitos coma este, remarcou Rueda.
Considerou que este novo escenario de autogoberno reforzará a seguridade xurídica de proxectos estratéxicos vencellados ao mar e ao turismo, contribuíndo a garantir un litoral vivo, dinámico e con máximas garantías ambientais, co mesmo nivel de implicación que permitiu acadar a excelencia recoñecida na concesión das bandeiras azuis: Aquí lanzamos esa mensaxe de que agora mesmo toda Galicia está preparada na súa costa e en todos os lugares onde a xente queira visitarnos, salientou o presidente.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
