jueves, 10 de julio de 2025
A conselleira de Medio Ambiente e Cambio Climático, Ángeles Vázquez, anunciou hoxe que o primeiro Centro de Protección Animal, que dará servizo a concellos de menos de 5.000 habitantes, estará no concello de Curtis.
Durante unha visita á parcela na que se localizará esta nova infraestrutura, a conselleira explicou que este primeiro centro para a protección e acollida de animais de compañía abandonados, extraviados ou vagabundos ten como obxectivo reforzar a nivel autonómico o labor desempeñado polas administracións locais e as entidades sin ánimo de lucro.
Nesa liña, prestarase especial atención a aqueles municipios con menos poboación, que son os que teñen máis dificultades para dispor dos medios necesarios para asumir de maneira satisfactoria estas tarefas e cumprir coas obrigas legalmente establecidas, engadiu Ángeles Vázquez.
En concreto, este novo centro, que conta cun orzamento inicial estimado de 2,07 millóns de euros, que será cofinanciado con fondos Feder, localizarase nunha parcela de preto de 24.000 m2, na zona de reestruturación parcelaria de Fisteus, en Curtis. Trátase dunha situación idónea desde o punto de vista loxístico, ao contar con boas comunicacións, e xeográfico xa que está próximo a municipios con menor poboación, que, tal e como incidiu a conselleira, é onde se ten identificado unha maior necesidade deste tipo de infraestruturas.
O centro en si terá unha superficie de 2.300 m2 con capacidade para 300 cans e 200 gatos e as súas instalacións incluirán, entre outras dependencias, áreas para corentena, maternidade, illamento infeccioso, hospitalización, animais agresivos ou mantemento habitual de exemplares. A maiores, haberá un módulo veterinario con consulta específica de gatos e dúas de cans, sala de hixiene, un quirófano e unha sala de radioloxía. O complexo completarase cunha área administrativa.
Liñas de financiamento e parques caninos
Durante a súa intervención, a conselleira subliñou que esta nova actuación vense sumar a outras iniciativas xa postas en marcha polo Goberno galego como as diferentes liñas de financiamento tanto para apoiar a adopción de animais de compañía por parte de particulares como para axudar a entidades locais e asociacións protectoras a sufragar os custos da atención que prestan nos seus territorios e centros.
Nese senso, cómpre lembrar que ata o vindeiro mes de setembro está aberto o prazo para optar a esas tres liñas de axudas. No caso dos apoios ás entidades locais, o orzamento é de 850.000 euros, mentres que para as asociacións protectoras o importe dispoñible de 480.000 euros. En canto ás axudas para adopción, a Xunta destina 40.000 euros a esta iniciativa. En total, a Xunta triplicou este ano o orzamento reservado a colaborar no coidado e protección dos animais de compañía abandonados, pasando de 450.000 euros a preto de 1,4 millóns de euros.
Ademais, Ángeles Vázquez fixo fincapé en que a Xunta leva anos sendo pioneira nesta materia con medidas como a Lei de benestar animal de Galicia, aprobada no ano 2017, con medidas novidosas en base a tres principios fundamentais: a prevención dos abandonos, a aposta pola adopción e o obxectivo do maltrato cero.
Para concluír, a conselleira lembrou que o Goberno galego ten o obxectivo de dotar ás sete grandes cidades galegas dun parque canino en colaboración cos seus concellos. Na actualidade, Ferrol xa ten pechada a localización do seu mentres que se está a avaliar diferentes propostas de parcelas cos de Lugo, Pontevedra e Ourense.
O Festival Abanea celebrará entre o 16 e o 20 de xullo a súa cuarta edición cun programa de danza contemporánea de distintos estilos que distribuirá 15 funcións de nove compañías entre os concellos de Ames, Outes, Marín, Foz e Celanova. ISMO Cultura, colectivo organizador do encontro, estenderá así a súa actividade de exhibición e dinamización ás catro provincias. A bailarina Andrea Castro presentou a primeira fase do espectáculo Lola y los lamentos, como artista seleccionada para o acompañamento bienal 20252026 co que o festival apoia procesos de creación de artistas emerxentes e que nesta edición terá como resultado a estrea de 'A mona de seda'.
As diversas actividades do festival terán lugar do 28 de xullo ao 1 de agosto no claustro do Mosteiro de San Salvador de Celanova. A actuación que inaugurará a cita será a da Banda de Música de Celanova con James Morrison, un concerto único en España que terá lugar ás 20,30 horas. Ademais deste, subirán ao escenario a Boston Brass de Estados Unidos, Abraham Cupeiro coa Orquestra Gaos e pechará a edición o Hércules Brass Ensemble dirixido por Isabel Rubio e coa Boston Brass e Adam rapa como solistas. Así, os concertos complementaranse con cinco días de actividades formativas para un centenar de estudantes procedentes de distintas comunidades autónomas. Clases de alto nivel da man dalgúns dos participantes nas actuacións e un seguimento continuo e individualizado que garante un acompañamento pedagóxico para o alumnado que xa leva participado en varias edicións consecutivas do festival.
