miércoles, 8 de abril de 2026
Nota de prensa remitida por el Gabinete de Comunicación de la Xunta de Galicia:
O Centro Galego de Arte Contemporánea, dependente da Consellería de Cultura, Educación e Ordenación Universitaria, acollerá do 23 ao 25 de maio o seminario Canles Alternativas de creación, resultado da colaboración entre o grupo de investigación Arte e Estética Contemporáneas, da Universidade de Santiago de Compostela, e o propio museo. Neste encontro temático analizarase a evolución de propostas colectivas de produción cultural catalogadas de alternativas ou independentes que se produciron nas últimas décadas en paralelo á consolidación dun sistema institucional da arte.
Este seminario desenvólvese no marco do proxecto de investigación Canles alternativas de creación experimental. O eixo atlántico (1975-2012), e é resultado da colaboración entre o grupo de investigación Arte e Estética Contemporáneas, da Universidade de Santiago de Compostela, e o Centro Galego de Arte Contemporánea. O seu obxectivo é indagar nas propostas alternativas que se desenvolveron en Galicia e no norte de Portugal dende os anos setenta ata a actualidade. Neste foro participarán membros de colectivos e especialistas deste e doutros contextos peninsulares. Analizaranse casos concretos proxectos e espazos e estableceranse relacións cos seus ámbitos e realidades históricas, dando así continuidade ao primeiro seminario, de carácter teórico, que tivo lugar na primavera do ano 2011.
Este foro está destinado a estudantes, profesionais e persoas interesadas nos ámbitos da creación artística, a historia da arte e a xestión cultural. As solicitudes para asistir pódense presentar na recepción do CGAC, chamando aos teléfonos do Servizo de Actividades e Proxectos Educativos ou ben a través do correo electrónico cgac.actividades@xunta.es, indicando os seguintes datos: nome, enderezo postal e electrónico, teléfono de contacto e ámbito de estudo ou traballo. O prezo da matrícula é de 20 euros par ao público xeral e de 12 euros para os membros da Asociación de Amigos do CGAC, estudantes e desempregados.
Na primeira xornada as conferencias servirán para facer un percorrido polas iniciativas e grupos que, desde os anos oitenta no Estado español e con gran forza desde finais dos noventa no norte de Portugal, contribuíron a debuxar unha historia diferente da arte contemporánea; unha historia moito máis complexa e múltiple do que parecen reflectir os grandes eventos e os museos.
O segundo día abordaranse, coa axuda de especialistas directamente implicados nesa tarefa, as tensións e conflitos que poden provocar a conservación e a posta en valor, por parte das institucións, dos movementos que nos anos setenta e oitenta se caracterizaban por unha xestión colectiva e unha práctica política que fai difícil a súa catalogación.
Na última xornada, co ánimo de establecer unha crítica comparada con aquelas iniciativas históricas, presentaranse diferentes proxectos que na actualidade supoñen unha alternativa aos formatos tradicionais da arte contemporánea, en xeral ríxidos e impermeables. Ben pola súa morfoloxía en rede, pola súa capacidade de autoxestión e independencia, ou pola súa flexibilidade á hora de acoller diferentes contidos, as propostas que pecharán as xornadas servirán sen dúbida para asentar un diálogo necesario con experiencias e contextos que teñen un longo percorrido nos últimos corenta anos.
Doutra banda, o CGAC acollerá o vindeiro 27 de maio o proxecto Sen moverte do sofá, unha serie de talleres de arquitectura para nenos de entre 7 e 11 anos onde se mostrarán as características de diferentes cidades españolas a través das características particulares de cada urbe. A través de conexións virtuais, os aprendices de arquitectura, investigarán e intercambiarán información sobre os parecidos e as diferenzas entre as cidades; a súa historia, estrutura, modelos de crecemento e singularidades, que axudan a entender, de xeito global, os lugares que habitamos.
O rapaces crearán unha maqueta da cidade de destino (Palma de Mallorca, Madrid, Valencia, A Coruña), para despois construír a escala grande algún dos seus edificios máis emblemáticos. As construcións faranse a partir do Sistema Lupo (do arquitecto Fermín Blanco): unha serie de pezas modulares que permiten múltiples posibilidades de combinacións, formas, proporcións, xogos de equilibrio e estratexias de acción.
Os talleres terán lugar o domingo 27 de maio en Santiago de Compostela, o sábado 9 de xuño en Palma de Mallorca e o sábado 23 de xuño en Madrid. As actividades son de balde e o prazo de inscrición xa está aberto.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
