domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
Representantes dunha decena de empresas discográficas galegas asistirán o mércores 14 de marzo na Cidade da Cultura de Santiago a unha reunión informativa sobre o proxecto D2COM, que promoven conxuntamente Agedi e Promusicae co obxectivo de ofrecer unha solución colectiva de negocio electrónico destinada a potenciar a innovación nas prácticas comerciais das pemes do sector da música gravada.
A Agadic (Axencia Galega das Industrias Culturais) da Consellería de Cultura, Educación e Ordenación Universitaria e Agaphono (Asociación Galega de Produtoras Fonográficas) colaboran na celebración en Galicia desta sesión profesional, que se desenvolverá a partir das 11.00 horas. No transcurso do encontro afondarase nos detalles desta iniciativa de Agedi sociedade autorizada polo Ministerio de Cultura para a xestión dos dereitos de propiedade intelectual dos produtores fonográficos aos que representa e Promusicae principal asociación española de produtores musicais, para a que se contou co financiamento do Ministerio de Industria, Energía e Turismo a través do Plan Avanza.
Segundo se especifica na súa memoria, o proxecto materialízase mediante a posta en marcha dun novo método para a distribución electrónica de contidos dixitais no ámbito da música, tanto de audio como de vídeo, que vén resolver as necesidades e problemas constatados nas pemes do sector. Adicionalmente, D2COM busca simplificar os requirimentos técnicos e administrativos na xestión de negocios para a venda ou difusión deste tipo de contidos dixitais.
A través deste programa crearase un almacén dixital que albergará a música dos socios de Agedi, ao tempo que o dotará dunha serie de mecanismos para que os contidos sexan accesibles a través de tendas dixitais ou emisoras, entre outras plataformas. A través deste sistema, resolverase a loxística necesaria para facilitar aos selos independentes a venda en liña da súa música, contribuíndo neste sentido ao desenvolvemento do mercado dixital en España.
Así, as pemes participantes poderán por en marcha as súas propias tendas dixitais, ademais de aloxar neste centro de datos unha copia de seguridade dos seus contidos, gardados aquí con todas as garantías de seguridade e accesibles desde calquera lugar vía Internet.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
