domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
Un dos principais obxectivos da política lingüística do Goberno galego é conseguir que todos os cidadáns poidan ter a posibilidade de vivir en galego e que ningún cidadán vexa minguado o exercicio dos seus dereitos lingüísticos. Son as palabras do presidente da Xunta, Emilio Pérez Touriño, durante a inauguración, en Santiago, da xornada Novas ferramentas TIC en galego: mellora da produtividade, acto no que tamén participou a secretaria xeral de Política Lingüística, Marisol López.
Para a consecución deste obxectivo o xefe do Executivo autonómico considerou fundamental realizar un esforzo en todo o que se refire á incorporación da lingua galega aos novos contornos tecnolóxicos e, en particular, aos instrumentos informáticos que, sinalou, hoxe forman xa parte inescusable da vida cotiá da inmensa maioría da cidadanía. Por iso puxo de relevo a acción normalizadora que está a realizar neste eido a Secretaría Xeral de Política Lingüística e valorou a asunción, por parte dun número crecente de empresas, da convición de que o galego vende ben e de que as grandes empresas transnacionais deben incorporar aos seus criterios de comunicación unha relación respectuosa e amable coas linguas existentes nos mercados locais.
Na súa intervención, Emilio Pérez Touriño lembrou que o obxectivo do Goberno que preside é lograr que o galego sexa unha lingua forte, vigorosa e con futuro, de aí que considerou necesario e esencial levar a cabo accións de afirmación e promoción do galego en todos os ámbitos da vida pública e da actividade social.
A política de recuperación lingüística que estamos a levar a cabo en Galicia é unha política baseada en accións de afirmación e promoción do idioma galego que, a medio prazo, deben conducir á equiparación de oportunidades e presenza social entre a lingua galega e a lingua castelá, aseverou o presidente da Xunta lembrando que isto se debe facer sen imposicións de ningún tipo e co máximo respecto ás opcións lingüísticas dos cidadáns, pero desde a conciencia e a convición de que ninguén fará polos galegos o que aos galegos nos corresponde facer, insistiu.
Consenso social sobre a necesidade de recuperar o galego
Na mesma liña, Emilio Pérez Touriño subliñou que o Goberno que preside non quere un país monolingüe, senón todo o contrario: un país de cidadáns capacitados para desenvolverse en varios idiomas, nomeadamente o inglés, a partir engadiu-, do coñecemento competente do galego e do castelán, que son as dúas linguas oficiais de Galicia e dous dos idiomas que a Constitución recoñece como linguas españolas e patrimonio de todos.
En Galicia non hai conflito lingüístico e tampouco o vai haber no futuro, aseverou Touriño, lembrando, ao mesmo tempo, a necesidade de que o galego sexa apoiado en maior medida que o castelán debido aos anos de abandono e marxinación que sufriu e que propiciaron que fose unha lingua moi vulnerable, que só iniciou o seu proceso de recuperación legal e de institucionalización coa restauración da democracia e do autogoberno.
É certo que o galego necesita de apoios que non precisa o castelán, incidiu o presidente da Xunta ao respecto, sinalando que pode haber diferenzas de matiz e mesmo discrepancias sobre a intensidade, o enfoque e o acerto das medidas de recuperación lingüística, pero asegurando que non ten dúbidas do amplo consenso social sobre a necesidade de que haxa unha política lingüística que favoreza a recuperación do galego. Neste sentido lembrou que ese amplo consenso social tivo sempre, durante todo o período democrático, un reflexo político que só se viu enturbado nos últimos meses por actitudes oportunistas que, finalmente non lle reportaron aos seus responsables ningún rédito electoral, sinalou. Eu agardo que as urnas movan á reflexión aos que decidiron romper, sen ningún argumento de peso, o consenso político sobre o galego, engadiu o presidente ao respecto.
Emilio Pérez Touriño non quixo concluír a súa intervención sen transmitirlle o seu agradecemento a todas as empresas e entidades involucradas na organización da xornada Novas ferramentas TIC en galego: mellora da produtividade e a todas aquelas que, día a día, achegan un bit máis na normalización da lingua galega e no crucial ámbito das tecnoloxías da información e da comunicación.
As novas tecnoloxías: unha locomotora para as linguas
Pola súa banda, a secretaria xeral de Política Lingüística, Marisol López, manifestou que as novas tecnoloxías son unha locomotora para a lingua nos diferentes sectores, que permitirán avanzar na normalización do galego.
Marisol López considerou que o futuro das linguas ten nas novas tecnoloxías un novo factor para medir a súa viabilidade e a súa saúde, contribuíndo ademais a abrir novas oportunidades para achegármonos a un mundo global desde a nosa singularidade e desde a nosa creatividade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
