lunes, 22 de diciembre de 2025
Nota de prensa remitida por el Gabinete de Comunicación de la Vicepresidencia da Igualdade e do Benestar de la Xunta de Galicia:
O vicepresidente da Xunta, Anxo Quintana, salientou a importancia de coñecer a historia propia de Galiza, que a define como nación, para así fortalecer a nosa identidade. Quintana presentou esta mañá a segunda edición do xogo de rol Irmandiños: A Revolta, que organiza a Vicepresidencia da Xunta a través da Dirección Xeral de Xuventude e Solidariedade. Para o vicepresidente, iniciativas como esta permiten achegarnos á nosa historia sen complexos, sen prexuízos e sen sentimentos de inferioridade, como se nos quixo inculcar durante moito tempo; senón con interese e a mente aberta, que é a mellor actitude para aprender.
O xogo, escrito e dirixido por 13Negativo, está ambientado na Galiza medieval do século XV e celebrarase no Castelo de Monterrei entre o 5 e o 7 de outubro. Medio milleiro de mozas e mozos poderán tomar o antigo bastión nesta aventura que os converterá en protagonistas dunha historia que ten como marco de fondo a Segunda Revolta Irmandiña, revivindo así a Galiza do ano 1467, cando os labregos se alzaron en armas contra os señores feudais.
Con esta actividade, un dos maiores xogos de rol que se organizan no Estado, preténdese dar a coñecer a Historia de Galiza, familiarizando aos participantes con personaxes da época como Roi Xordo, o arcebispo Fonseca, Henrique IV, Pedro Madruga, Diego de Lemos, Alonso de Lanzós ou Pardo de Cela. Ao mesmo tempo, a iniciativa permite pór en contacto á mocidade de forma activa co mundo do teatro e dos xogos de rol, e contribúe a fomentar o interese pola lectura de obras literarias históricas relacionadas coa temática do xogo. Trátase de propoñer modelos alternativos de ocio, fomentando a convivencia e o traballo en equipo e estimulando a imaxinación.
Quintana destacou que o coñecemento da historia galega que fomenta este xogo de rol non é incompatible co interese polo foráneo, xa que canto mellor coñezamos o patrimonio da nosa propia identidade máis doado nos resultará achegarnos ao doutras culturas, recalcou. Ademais, para Quintana resulta evidente que os galegos e as galegas queren coñecer a súa historia a xulgar polas máis de 71.000 persoas que xa visitaron a exposición Nazón de Breogán nos máis de 25 concellos que percorreu.
Para apuntarse a Irmandiños: a Revolta, os interesados terán que aboar unha cota de participación de 30, cun desconto do 25% para os titulares do Carné Xove ou o Carné Máis, que inclúe o desprazamento en autobús ata a zona do xogo (os arredores do castelo de Monterrei, preto de Verín) e a comida, ademais da participación no xogo e a estancia. Todos aqueles que se inscriban durmirán en tendas de campaña as noites que dura o xogo e por suposto poderán escoller o bando ao que pertencer: ou señores ou labregos.
Os mozos e mozas, de entre 18 e 30 anos, que queiran tomar parte nesta iniciativa poden anotarse dende hoxe ata o vindeiro día 27 de setembro. Admitiranse un máximo de 500 xogadores e todos os que se queiran apuntar ou solicitar máis información pódeno facer chamando aos seguintes teléfonos 981 545 937, 981 545 702, 981 544 869, ou ben na Dirección Xeral de Xuventude e Solidariedade. Tamén se pode acceder a toda a información sobre o xogo e a historia nas páxinas web www.irmandinhos.com, www.13negativo.com, ou www.xuventude.net.
O programa Radio na Biblio, que vai polo noveno ano en funcionamento, chega este curso a 245 centros de ensino que contan cun laboratorio de radio no que traballan as competencias vencelladas á alfabetización mediática, lingüísticas ou de expresión escrita e oral, entre outros. Con nove cursos en marcha, trátase dun programa consolidado que aproveita a posta en marcha dunha emisora de radio na biblioteca para traballar habilidades e destrezas e que permite o tratamento de contidos curriculares mediante metodoloxías activas e innovadoras que facilitan a aprendizaxe. Ademais, as actuais tecnoloxías da información e da comunicación facilitan o uso da radio como ferramenta pedagóxica de gran alcance para a difusión dos proxectos e iniciativas do centro educativo.
Tivo lugar a na cerimonia de entrega dos XVIII Premios Nacionais de Artesanía 2025, na que resultaron premiadas dúas candidaturas galegas. O artesán Aitor Martínez López de Arbina (Tomiño), especializado en tornería de madeira, resultou gañador na categoría Produto e a Fundación Artesanía de Galicia obtivo o recoñecemento na categoría Promociona para Entidades Públicas polo seu proxecto 'Artesanía no Prato'.
