domingo, 8 de noviembre de 2026
Nota de prensa remitida por el Gabinete de Comunicación de la Xunta de Galicia:
O presidente da Xunta de Galicia, Emilio Pérez Touriño, recibe o martes 24 de xullo pola mañá en Monte Pío a máis dun cento de representantes de asociacións galegas que traballan na Comunidade Autónoma a prol da igualdade. No decurso do acto, denominado A Véspera, ábrense ás portas de Monte Pío aos cidadáns e ponse o acento sobre a necesidade de que Galicia continúe avanzando en materia de igualdade.
O acto A Véspera, que este ano se celebra por segunda vez, pretende deste xeito servir de homenaxe e recoñecer, por parte da Presidencia da Xunta, o esforzo continuado que as diferentes asociacións representadas realizan ao longo de todo ano a prol da igualdade. Precisamente, o marco político actual, no que se vén de aprobar recentemente no Parlamento a Lei de Traballo en Igualdade das Mulleres de Galicia e a Lei para a Prevención e o Tratamento Integral da Violencia de Xénero, fai deste o momento propicio para dedicar A Véspera ás mulleres
Así, logo de que o ano pasado se recoñecese o labor das institucións e fundacións que traballan en Galicia polo recoñecemento da identidade galega, este ano o acto terá como protagonistas ás mulleres. Destacan, entre as diferentes asociacións representadas, a Fundación Érguete, a Asociación Afamer Galicia, a Asociación de Mulleres Axiña, a Asociación de Mulleres Nosa Señora de Aguas Santas de Frades, a Federación de Asociacións de Mulleres Anaral, a Asociación Alecrín de Vigo, a Asociación A Xuntanza de Lugo, a Asociación Provincial de Amas de Casa e Consumo Rías Baixas, a asociación Mulleres pola Igualdade da Coruña, a asociación de Mulleres Progresistas de Ferrol, a Asociación Mulleres Xitanas de Galicia Adikernado ou a Federación Provincial de Mulleres para o Desenvolvemento Rural Ceres, entre moitas outras.
Espectáculo de luz e son
Xa pola noite do día 24 de xullo, Emilio Pérez Touriño asiste, no Hostal dos Reis Católicos de Santiago, ao concerto que ofrecerá a Real Filharmonía de Galicia con motivo da Festividade do Apóstolo Santiago. Inmediatamente despois, desde o Pazo de Raxoi, Pérez Touriño presidirá o tradicional espectáculo de luz e son que se celebra no Obradoiro con motivo do Día de Galicia.
Ofrenda ao Apóstolo
Ao día seguinte, o presidente da Xunta asiste aos actos de ofrenda ao Apóstolo Santiago que acolle a Catedral de Santiago e nos que a presidenta do Parlamento, Dolores Villarino, actuará como delegada rexia.
Pola tarde do día 25, en San Domingos de Bonaval, Pérez Touriño preside a entrega da Medalla de Ouro de Galicia a Isaac Díaz Pardo. Coa entrega desta distinción, a máxima que concede o Goberno galego, a Xunta recoñece a traxectoria de Díaz Pardo a prol da cultura da comunidade, especialmente nos eidos da literatura e das belas artes. A homenaxe destaca o periplo dun home que levou a bandeira da arte galega polos todos os países non que viviu ou pasou parte da súa vida.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
