viernes, 11 de septiembre de 2026
A directora da Axencia Galega de Innovación, Carmen Cotelo, participou esta mañá na presentación do OneHealth DataSpace, o espazo de datos multisectorial impulsado polo CESGA (Centro de Supercomputación de Galicia) para favorecer a colaboración entre organizacións dos ámbitos da saúde humana, animal e ambiental. A representante da Consellería de Educación, ciencia, Universidades e FP destacou a evolución do proxecto, que conta xa con 36 entidades adheridas e 43 casos de uso, consolidándose como unha contorna de cooperación para transformar os datos en coñecemento útil mediante tecnoloxías de compartición segura, intelixencia artificial, análise avanzada e computación de altas prestacións.
Durante a súa intervención, a directora xeral sinalou que OneHealth DataSpace constitúe o punto de partida da futura factoría europea de IA en España, denominada 1HealthAI, para desenvolver aplicacións de intelixencia artificial no ámbito da saúde. O proxecto está financiado pola Empresa Común Europea de Computación de Altas Prestacións (EuroHPC JU), o Ministerio de Ciencia, Innovación e Universidades e a Xunta, e aspira a converterse nunha peza clave do futuro ecosistema europeo de IA aplicada á saúde. Neste sentido, destacou que ambas iniciativas contribúen a situar Galicia na vangarda da aplicación de tecnoloxías avanzadas, como a intelixencia artificial e a computación de altas prestacións, a sectores de grande impacto económico e social como o sanitario.
Ao longo da xornada, o equipo responsable deu a coñecer os principais avances acadados, presentou algúns dos casos de uso en desenvolvemento e explicou o encaixe desta plataforma co Espazo Nacional de Datos de Saúde (ENDS) e co Espazo Europeo de Datos de Saúde (EHDS), así como as oportunidades que abre de cara á posta en marcha da 1HealthAI Factory.
O proxecto conta cun financiamento de 3 millóns de euros a través do Plan de Recuperación, Transformación e Resiliencia (PRTR), con fondos europeos NextGenerationEU. Ademais, ampliou a súa actividade ata o 31 de agosto de 2026, o que permitirá incorporar novas organizacións, reforzar os desenvolvementos xa iniciados, promover novos proxectos e intensificar as accións de difusión, formación e transferencia de coñecemento. Paralelamente, continúase traballando na súa futura integración e interoperabilidade co Espazo Nacional de Datos de Saúde.
Un ecosistema en plena expansión
Os 43 casos de uso activos representan un importante avance respecto dos sete cos que se iniciou o proxecto. Tamén medrou a participación institucional, pasando de 22 entidades adheridas en abril ás 36 actuais. Este crecemento evidencia a consolidación de OneHealth DataSpace como un ecosistema colaborativo no que administracións, centros de investigación, universidades, empresas e outras organizacións comparten, analizan, procesan e almacenan datos nunha contorna segura para impulsar solucións innovadoras desde unha visión integrada da saúde humana, animal e ambiental.
Encontros co sector para ampliar a rede de colaboración
Co obxectivo de seguir incorporando novos participantes, o CESGA puxo en marcha os Mini Encontros OneHealth DataSpace, unha iniciativa dirixida a achegar este espazo de datos a grupos de investigación e entidades interesadas en explorar novas oportunidades de cooperación. Baixo o lema Os teus datos. O teu control. Coñecemento que transforma a saúde global, cada sesión combina unha presentación do proxecto cun espazo de diálogo destinado a identificar necesidades e favorecer a incorporación de novos casos de uso. A última sesión desta edición celebrarase o 29 de xullo no Instituto de Investigación Sanitaria Galicia Sur (IIS Galicia Sur), no Hospital Álvaro Cunqueiro de Vigo.
A reposición dálle continuidade á aposta do Centro Dramático Galego por recuperar títulos do seu repertorio que manteñen a demanda do público máis alá da súa primeira exhibición. No caso de 'A serie clopen', as 33 funcións ofrecidas no Salón Teatro durante a súa estrea en 2025 reuniron arredor de 5.500 espectadores, antes de iniciar unha serie de representacións por outros espazos de Galicia e de Portugal. O regreso aos escenarios prodúcese despois do recoñecemento acadado pola produción nos Premios de Teatro María Casares, pois obtivo dous galardóns: Natalia Pajarito, como mellor actriz protagonista, e Marta Alonso Tejada, pola dirección de movemento.
O sábado 12 de setembro chegará un dos pratos fortes do ciclo: A Movida Viguesa e a Homenaxe a Golpes Bajos. Esta histórica xornada supón o regreso aos escenarios de artistas fundamentais para comprender a historia musical de Vigo e de Galicia. Bandas e músicos que naceron na cidade e que, desde aquí, conquistaron o panorama nacional e mesmo internacional. Reunir nun mesmo escenario a Golpes Bajos, Semen Up, Miguel Costas de Siniestro Total, Killer Barbies e Stoned at Pompei é moito máis que un concerto: é unha homenaxe a unha xeración irrepetible e a unha cidade que marcou unha época dentro da música española.
