sábado, 7 de noviembre de 2026
A directora da Axencia Galega de Innovación, Carmen Cotelo, visitou este mediodía o novo laboratorio de investigación en cuántica que o Centro de Investigación en Tecnoloxías da Información e as Comunicacións (CITIC) vén de poñer en marcha. Cotelo destacou que esta nova dotación reforza as capacidades de Galicia en tecnoloxías cuánticas e completa a oferta de infraestruturas científico-tecnolóxicas do ecosistema de I+G+i. A posta en marcha deste novo laboratorio, en palabras da directora, sitúa a Galicia nunha posición aínda máis competitiva neste ámbito e permite abordar de maneira integral a investigación, a experimentación, o desenvolvemento de aplicacións e a súa transferencia ao tecido produtivo.
Na visita, na que participou o vicerreitor de Investigación e Transferencia da UDC, Jerónimo Puertas, e o director do CITIC, Manuel González, a directora da Axencia Galega de Innovación puido coñecer o novo laboratorio, que conta co apoio Ministerio de Ciencia, Innovación e Universidades, a través da Axencia Estatal de Investigación e co financiamento de fondos europeos. Para Carmen Cotelo, esta infraestrutura permitirá consolidar un ecosistema cuántico no que as sinerxías e complementariedades entre os distintos axentes multiplican o seu valor científico, tecnolóxico e innovador.
A directora da Axencia destacou o carácter pioneiro do centro no eido da computación cuántica, coa súa participación no primeiro proxecto europeo sobre cuántica que se desenvolveu en Galicia, NEASQC (Next Applications of Quantum Computing), ou no máis recente QEX, Centro Europeo de Excelencia Cuántica. Ademais, forma parte desde o inicio da Rede galega de tecnoloxías cuánticas, a estrutura de gobernanza do Polo de tecnoloxías cuánticas de Galicia integrada por Administración, centros tecnolóxicos e de investigación, universidades e sector empresarial para sumar esforzos e avanzar no liderado de Galicia neste eido.
Cotelo sinalou que esta infraestrutura súmase ás capacidades do Cesga e das universidades de Santiago de Compostela e Vigo nesta materia. En concreto, o Instituto Galego de Física de Altas Enerxías (IGFAE) contará cun laboratorio mixto USC-Cesga especializado en tecnoloxías cuánticas aplicadas á física de partículas e nuclear, e AtlanTTic está a crear un laboratorio compartido UVigo-Cesga especializado en computación cuántica óptica.
Por último, a directora da Axencia Galega de Innovación reuníuse con varios investigadores do centro. Entre eles atopábanse Eduardo Mosqueira Rey, subdirector do CITIC e coordinador na UDC do Máster en Ciencia e Tecnoloxías de Información Cuántica, e Diego Andrade Canosa, membro do grupo de investigación de arquitectura de computadores e representante da Universidade da Coruña na Rede Galega de Tecnoloxías Cuánticas. Carmen Cotelo apuntou a necesidade de formar, consolidar e captar talento nesta área para aproveitar toda a potencialidade destas tecnoloxías na nosa comunidade.
Esta nova infraestrutura e talento contribúen ao posicionamento de Galicia como territorio de referencia para estas tecnoloxías, que serán cruciais no futuro para dar resposta a retos complexos en eidos como a saúde, a competitividade industrial e a seguridade das comunicacións. Neste senso, Galicia está a apostar por estas tecnoloxías no marco do Polo de tecnoloxías cuánticas de Galicia e do Plan galego de investigación e innovación 2025-2027, no que figuran como iniciativa de alto impacto.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
