domingo, 8 de noviembre de 2026
Durante a xornada analizáronse cuestións clave como a visión estratéxica da IA na Administración pública, os seus riscos e a cooperación entre comunidades autónomas, así como os modelos de gobernanza desta tecnoloxía e o seu impacto na organización do traballo e na xestión do talento.
O programa estruturouse en diversas mesas de traballo especializadas nas que se trataron ámbitos como a aplicación da IA no posto de traballo, o seu despregamento nos procesos de desenvolvemento e operacións, así como o seu impacto no ámbito sanitario. Tamén se abordaron os retos da ciberseguridade na era da intelixencia artificial e a protección dos propios sistemas de IA.
O encontro completouse cun plenario final de posta en común das conclusións das mesas de traballo, no que se puxeron de relevo os principais retos e oportunidades que presenta a integración da intelixencia artificial nas administracións públicas, así como a necesidade de reforzar a colaboración entre territorios.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
