martes, 21 de julio de 2026
O conselleiro de Educación, Ciencia, Universidades e FP, Román Rodríguez, participou hoxe na xornada de presentación dos novos equipamentos do CESGA (Centro de Supercomputación de Galicia), instalación que vai incorporar un segundo computador cuántico, denominado IQM Spark, que se suma aos equipos xa anunciados nos últimos meses. Como salienta o representante da Xunta de Galicia, o novo supercomputador e os dous novos computadores cuánticos que se van adquirir situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais.
Os computadores cuánticos son adquiridos a través de Telefónica. Deles, o computador cuántico de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será o buque insignia. Esta separación técnica permitirá que o maior se dedique á produción científica e industrial, mentres que o do menor tamaño servirá como banco de probas para desenvolver a capacidade técnica necesaria neste campo emerxente e validar así novos desenvolvementos antes do seu escalado.
Pola súa banda, o novo supercomputador Finisterrae IV, adxudicado a Fsas Tecnchonologies (Fujitsu) e que multiplicará por sete a capacidade de cálculo do actual (Finisterrae III), representa un salto tecnolóxico ao integrar a supercomputación coas posibilidades que abre o uso da intelixencia artificial a gran escala. Ademais, o sistema de almacenamento suporá máis do dobre que o actual e tamén experimentará unha mellora técnica notable, adoptando unha arquitectura xerarquizada que garanta un acceso eficiente e sostido aos datos. O sistema foi deseñado cunha forte énfase na eficiencia enerxética, empregando tecnoloxías de refrixeración líquida para soportar os fluxos de datos intensivos da computación científica actual. En conxunto, esta tecnoloxía contribuirá aínda máis a reforzar a capacidade da nosa I+G+i.
Román Rodríguez, acompañado pola directora da Axencia Galega de Innovación, Carmen Cotelo, detallou as posibilidades de futuro que se abren co reforzo do CESGA desde varias perspectivas, e destacou o bo momento que está a vivir a ciencia e a innovación feitas na Galicia Calidade, algo que atribuíu ao traballo conxunto de administracións, universidades, centros de investigación, centros tecnolóxicos e empresas.
Abordar novos retos científicos
Co novo Cesga, a comunidade investigadora galega e do resto de España e Europa poderá acceder a recursos de cálculo avanzados e procesadores cuánticos, establecendo un ecosistema de datos de alto rendemento adaptado ás demandas e á complexidade dos retos científicos actuais e, especialmente, os que virán da man da nova Factoría Europea de IA 1HealthAI, outro dos fitos acadados recentemente pola I+G+i.
O Cesga está en pleno proceso de renovación das súas infraestruturas, subliñou o conselleiro, unha operación complexa cun investimento total de 56 M procedentes de fondos europeos do PERTE Chip (Proxecto Estratéxico para a Recuperación e Transformación Económica de Microelectrónica e Semicondutores en España no marco do Plan de Recuperación, Transformación e Resiliencia) e fondos propios da Xunta. É unha aposta decidida por reforzar o seu papel logo de décadas de traballo ao máis alto nivel, expresou o conselleiro, que animou aos asistentes a continuar esta camiño de progreso.
O reforzo do equipamento do Cesga responde á necesidade técnica de abordar cargas de traballo computacional moi elevadas en áreas como a intelixencia artificial, a simulación científica avanzada e a análise de datos a gran escala. Os novos equipos están pensados como unha evolución dos actuais, con especial énfase na adopción de infraestrutura especializada para IA e en sistemas de computación cuántica que permitan dar novos pasos na investigación de algoritmos cuánticos ou a integración de computación cuántica e clásica. Todo isto combina potencia, eficiencia operativa e escalabilidade técnica para dar soporte á investigación en disciplinas que van desde a xenómica ata a meteoroloxía.
Participantes na xornada
Na xornada celebrada na Cidade da Cultura participaron o subdirector xeral de Grandes Instalacións Científico-Técnicas do Ministerio de Ciencia, Innovación e Universidades, José Ignacio Doncel, e o vicepresidente de Investigación Científica e Técnica do Consello Superior de Investigacións Científicas (CSIC), José María Martell. Así mesmo, asistiron o subdelegado do Goberno na Coruña, Julio Abalde; o director científico do Cesga, Luis Orosa; o director de Infraestruturas e Apoio á Investigación do Cesga, José Ignacio López; o exdirector xeral de Investigación da Comisión Europea, José Manuel Silva, e o director do Centro de Supercomputación de Barcelona, Mateo Valero, ademais de directores de centros de investigación de Galicia.
O Atlantic Fest celebra este verán a súa décima edición consolidado como unha das citas musicais imprescindibles. Do 17 ao 19 de xullo, a praia da Concha de Vilagarcía de Arousa volverá acoller un festival que combina música, paisaxe, gastronomía e identidade propia, converténdose nun dos grandes atractivos culturais e turísticos das Rías Baixas durante a tempada estival. A décima edición do Atlantic Fest presenta unha programación que combina grandes nomes internacionais, referentes do panorama estatal e unha destacada presenza de artistas galegos. Entre as actuacións internacionais sobresae a presenza de Franz Ferdinand, nunha das súas poucas actuacións deste verán e única en Galicia.
O 60,66% dos 877 ciclos de Formación Profesional de réxime ordinario para o próximo curso en Galicia complétanse na primeira adxudicación de prazas pechada pola Consellería de Educación, Ciencia, Universidades e FP, e que dá dereito a matrícula. Segundo os datos recabados, un total de 57.118 persoas presentaron solicitude para cursar algunha modalidade de Formación Profesional, o que representa un incremento de preto do 2% (1.069 solicitudes máis) con respecto ao curso 2025-26, o que confirma, un ano máis, o interese que espertan estas ensinanzas entre os cidadáns en Galicia. O maior número de solicitudes rexístranse nos ciclos superiores da modalidade ordinaria, con 15.893 solicitudes, 643 máis (un 4,22% de incremento) que o curso pasado.
