sábado, 31 de octubre de 2026
O director xeral de Planificación Enerxética e Minas, Pablo Fernández Vila, asegurou esta mañá que Galicia está preparada para liderar o despregamento dos proxectos de almacenamento enerxético e converterse nun hub de xestión enerxética intelixente. Contamos cun tecido industrial preparado: unha industria automotriz e uns centros tecnolóxicos punteiros e a nosa capacidade de innovación en materiais está fóra de toda dúbida, subliñou ao tempo que asegurou que os recursos naturais dos que dispón a comunidade a converten nun referente en xeración de enerxías renovables unido á nosa capacidade técnica.
Fernández Vila participou en Santiago na inauguración da Battery 2026 III Xornada de Almacenamento Enerxético en Galicia, organizada polo Clúster das Enerxías Renovables de Galicia (Cluergal) en colaboración co Instituto Enerxético de Galicia (Inega). Alí, o director xeral lembrou que os sistemas de almacenamento enerxético resultan fundamentais para dar estabilidade ao sistema, tanto desde o punto de vista técnico como económico, grazas a súa contribución á resiliencia da rede e na redución das oscilacións dos prezos da factura eléctrica.
Nese punto, o director xeral apuntou que na actualidade Galicia conta con 46 expedientes de baterías -stand-alone e hibridacións- en tramitación, que suman 492,75 MW, aos que hai que engadirlle outros 3 expedientes (17,75 MW) xa autorizados, solicitudes de avais para 129 proxectos de almacenamento que suman 2.720 MW máis e varios proxectos de centrais de bombeo reversible.
Se queremos avanzar na descarbonización da nosa economía, precisamos incrementar o peso das renovables no mix enerxético e aquí é onde entra en xogo o almacenamento, como a chave mestra que permite que as renovables pasen de ser unha fonte variable a ser a base sólida do noso sistema eléctrico, asegurou Fernández Vila ao tempo que chamou a atención sobre a necesidade de definir un marco normativo que dea seguridade aos promotores destes proxectos. O sector necesita uniformidade de criterios e maior seguridade xurídica e as administracións tamén, rematou.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
