viernes, 7 de agosto de 2026
Dieu est timide, do francés Jocelyn Charle, obtivo o Premio Imaxinaria. A curta sitúa a acción nun tren. Ariel e Paul pasan o tempo debuxando os seus medos máis profundos. A aparición dunha pasaxeira misteriosa, Gilda, altera ese xogo
O Premio do Xurado recae en Cão Sozinho, de Marta Reis Andrade, directora portuguesa afincada en Portugal. A peza parte da imaxe dun can que queda só na casa ao tempo que o avó da autora atravesa a viuvez e ela mesma regresa desde Londres cunha forte sensación de soidade.
No palmarés entra tamén O Corpo de Cristo, de Bea Lema, autora galega nacida na Coruña, distinguida co Premio Territorio. A curta céntrase en Adela, unha muller que sente o acoso dunha presenza e busca alivio entre a psiquiatría, a relixión e os ritos populares, únicos espazos onde a súa experiencia semella atopar escoita. Desde esa premisa, a peza propón unha ollada fondamente persoal arredor da saúde mental, da incomprensión e da necesidade de ser atendida máis alá do diagnóstico. A obra formaba parte da representación galega da sección oficial a concurso.
O público adulto e infantil escollen as curtas Sulamaini e Snow Bear
O Premio do Público foi para Sulaimani, da cineasta india Vinnie Ann Bose, nada en Kerala e formada entre Ahmedabad e Francia; a curta sitúa o encontro de dúas mulleres nun restaurante de París, onde os sabores, os sons e a memoria fan aflorar a experiencia do desarraigamento.
O Premio do Público Infantil recaeu en Snow Bear, do animador e director estadounidense Aaron Blaise, con longa traxectoria en Disney; a peza conta a historia dun oso polar solitario que, nun medio hostil, emprende a procura dun amigo.
Galardón honorífico a Sylvain Chomet
Na cerimonia de clausura de «Imaxinaria» tamén se recoñeceu a traxectoria do cineasta francés Sylvain Chomet, nomeado tres veces aos Oscar. O realizador Alberto Vázquez, que dirixe o certame xunto á xestora cultural Matilde Rodríguez, entregaron o galardón de «Padriño do festival» a Chomet, unha das figuras máis recoñecidas da animación de autor europea.
Rematada a proxección da lendaria curta de Sylvain Chomet, comezará a lectura do palmarés. Un total de 38 películas de 18 países compiten por formar parte del.
O mellor do talento galego
Na xornada de clausura resolveuse tamén o concurso «Talento Novo», que nesta edición se abriu por primeira vez a centros educativos de toda Galicia. O primeiro premio, dotado con 600 euros e trofeo, foi para FLOW-R, de Manuel Alejandro Franco Garrido, Darío Fernández Fernández e Manuel Antón Díaz Rego. O certame concedeu ademais dous accésits, dotados con 200 euros e diploma cada un: o primeiro para ¡ANIMATE!, de Alex Prieto Mateus e Ange Nathan Guillén Olea, e o segundo para IMOS INDO, de Fabio Méndez Reyes e Mónica Rodiño Camiña.
«Imaxinaria» reuniu este ano 37 películas na súa sección oficial, chegadas de 18 países, e un programa paralelo que reforzou a presenza de títulos e autorías recoñecidas en grandes citas do sector, coa proxección de Decorado, do coruñés Alberto Vázquez, recente gañadora do Goya á Mellor Película de Animación; ou de Benvidos a Belleville, de Sylvain Chomet, nomeada aos Oscar. Houbo, ademais, diferentes charlas con profesionais de gran recoñecemento internacional e coloquios co público, ademais dunha nova sección, Foco Indie, dedicada a visións alternativas.
«Cultura por alimentos»
«Imaxinaria» forma parte do programa «Cultura por alimentos», que Afundación desenvolve en colaboración coa Federación Española de Bancos de Alimentos (FESBAL). A recadación íntegra da venda de entradas do festival destinarase a apoiar as actividades do Banco de Alimentos da Provincia da Coruña.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
